Kralendijk- Aworbonaire.nu, un inisiativa di ABC Online media, konosí di entre otro Bonaire.nu i BES-Reporter, tin e ambishon di trese mas notisia na papiamentu.

Harald Linkels i Sylvia de Leon, di Bonaire.nu, ta e dos personanan klave tras di e wèpsait nobo ku lo ta kompletamente na papiamentu.

‘Nos tin ku biba ku realidat. Bonaire.nu poko poko a bira e sitio di notisia ‘online’ mas grandi di Boneiru. Pero e ta skibí na hulandes. Un idioma ku hopi hende na Boneiru no ta dominá bon, òf simplemente no gusta mashá. E wepsait www.bes-reporter.com ta kubri notisia di Boneiru, St. Eustatius i Saba, pero na ingles’.

‘Pero ketu bai mayoria di e poblashon di Boneiru ta papia papiamentu, i esei ta algu di respetá i tene kuenta kun’é’, Linkels ta agregá.

Kalidat

Segun Linkels i De Leon, Boneiru konosé hopi medio di prensa, ku ta hasi un trabou ekselente. ‘Sin embargo, hopi di esakinan ta enfoká sea riba radio òf televishon. Nos tabata tòg sinti falta di ‘algu’ ora ta trata notisia ‘online’ i na papiamentu na Boneiru. Nos no a bin pa kompetí ku niun hende, pero debidamente nos ta kere ku nos por agregá algu si, ora ta trata di notisia di kalidat’.

E tim di ABC Online media ta konsistí di 8 empleado, hopi di kual ta traha pa e medio di prensa den forma di ‘part time’, banda di otro trabou ku nan tin. E adishon nobo den forma di Awor Bonaire, lo krea oportunidat adishonal pa hende lokal.

---

Lesa tambe:

---

• 
  Por deskubrí historia di antepasadonan ku e buki ‘Archivo Spièrtá’
• 
  ZJCN ta introdusí mehorashon den seguro médiko pa islanan BES 
• 
  Marco van de Kreeke bèk na aeropuerto Flamingo komo di dos direktor 
• 
  Otro charla mas pa mayornan tokante uso seif di medionan sosial serka mucha
• 
  Entrega di Kalènder 2025 “Ban Topa Nos Grandinan” na Gezaghèber John Soliano