Kralendijk- Dòkternan di e departamento di Salubridat Públiko awor por bakuná hende na kas tambe, ku motibu di salú no por akudí na un di e sentronan di bakunashon.

Mas tantu posibel ta pasa e personanan aki angua den veranda/dilanti di nan kas. Hende ku ta na kama, sinembargo, ta risibí e angua den kamber. Pa un sita pa haña e angua di corona na kas, por yama e number grátis 0800 0900 òf meil [email protected] 

Esnan ku ta biba den mesun kas ku e personanan ku ta pasa angua na kas, tambe por registrá pa pasa angua mesun dia ku e persona ku ta pasa angua na kas. Ta yuda si ora registrá, hendenan ta yena e deklarashon di salú; esei ta skapa tempu ora e dòkter bai kas. Hendenan ku pasa angua di corona na kas, mester bisti tapaboka ora ta bakuná.   

Rincon

Ya pa dos siman Salubridat Públiko ta pasa e angua di corona na kas den kaso spesial. Via dòkternan di kas, e departamento a haña un lista di pashènt ku no ta móbil. Na Rincon, dòkter Selly Pourier ta pasa hendenan angua ku nan mes no por bai e sitio di pasa angua. Te ku awor, a bakuná mas ku 7.000 hende na Boneiru ku unu òf ya kaba ku tur dos angua.