Kralendijk- Despues di simannan ku medidanan hopi severo, manera seramentu di tur pakus no-esensial i un ’toke de keda’ porfin e kantidat di hende ku ta tèst positivo a kuminsá baha basta konsiderablemente.

Te ku algun dia pasá esaki tabata kada bes entre 40 pa 50%, loke tabata ke men ku kasi mitar di tur hende ku tabata bai tèst pa Covid tabata sali positivo.

Di e total di 45 hende ku a bai pasa tèst djabièrnè solamente 5 persona a resultá di tin un tèst positivo. Esaki ta kondusí na un porsentahe di masomenos 11%. Esaki ta nifiká ku e virus ta plamando ménos rápidamente, loke ta lógiko tambe, ku un kantidat total di hende mas abou ku ta infektá ku Covid-19 awor aki.

Pa djasabra 10 di aprel 2021 tin 137 kaso aktivo di Covid-19 na Boneiru. 16 persona a rekuperá di Covid-19. Na tur tin 17 persona den hospital pa motibu di Covid-19. Tin 10 persona hospitalisá na Boneiru, 4 ta haña kuido intensivo. Tin 2 persona den hospital na Aruba i 5 persona den hospital na Colombia.