WILLEMSTAD – Doñonan di dokumentunan bieu i eksepshonal i publikashonnan por partisipá djabièrnè 20 di yanüari i djasabra 21 di yanüari na e dianan ku bo por kana drenta pa e balorashon na Universidat di Kòrsou. Na luna di mei di aña pasá e dianan di balorashon no a sigui.

Durante e dianan aki un balotadó ku a apuntá spesial ta evaluá e bukinan bieu ku a trese aden manera beibel bieu, atlas, obranan ilustrá i bukinan di biahe, manuskrito, kartanan bieu, pòtrèt, karchi postal i prenchi, riba nan balor.

Ku e akshon aki e Universidat ke duna un kontribushon na e konosementu lokal i komprondementu di balor di dokumentu- i publikashonnan bieu na Kòrsou.

Segun e Universidat pa sigurá e patrimonio kultural ta importante pa esnan ku tin publikashonnan bieu i eksepshonal konosé nan balor. E balor ta importante entre otro ora ta bai konsiderá pa invertí den medidanan pa konservá i/òf restourá i pa seguro.

E balorashon ta prinsipalmente dirigí riba bukinan di promé ku 1900. Si ta posibel e balorashonnan lo ta basá riba entradanan resien di produktonan semehante riba findishi. E balorashon lo ta solamente riba e dianan menshoná ariba, pues no via pòtrèt, telefon òf imeil. E gastunan pa un balorashon ta sinku florin pa un te masoménos djes buki òf seri di obra.

Un rapòrt di balorashon ta posibel, pero solamente pa bukinan balioso ku un balor for di 400 florin i kontra un tarifa ku a palabrá delantá.

E dianan di balorashon ta kuminsá mañan djabièrnè pa 1’or di mèrdia  te mitar di kuater atardi den biblioteka di Universidat na Jan Noorduynweg. Djasabra e ta di 10’or di mainta te 1’or di mèrdia.