WILLEMSTAD – Banko Sentral di Kòrsou i Sint Maarten (CBCS) ta spièrta konsumidó- i empresanan pa e rísiko ku ta oumentando di froude na momentu di transakshonnan digital. Segun e banko estafadónan ta hasi mas i mas uzo di datonan hòrtá pa ehekutá transakshonann no outorisá. Esaki ta forma un menasa serio pa e stabilidat finansiero di ámbos pais.

Froude digital ta kondusí na pèrdidanan finansiero dirèkt pa e konsumidó, segun e Banko. Tambe e ta pèrkurá pa un oumento di transakshonnan ku ta rechasá, gastunan haltu pa buk bèk i èkstra gastu pa negoshantenan. Esaki ta mina integridat di sistemanan finansiero, ta stroba aktividatnan legítimo di empresanan i ta pèrhudiká e konfiansa di e konsumindó den transakshonnan digital, segun e Banko.

Medidanan di protekshon 

Banko Sentral ta konsehá konsumidónan pa ta alerta i no duna nunka datonan personal di banko via telefon òf meil. Tambe ta konsehá pa kontrolá estado di kuenta di banko ku regularidat. Detekshon tempran di transakshonnan no outorisá ta prevení mas mal uso.

Tambe Banko Sentral ta konsehá pa aktivá notifikashon di transakshonnan. Esei ta notifikashonnan realtime via sms òf meil, ku por yuda pa deskubrí froude na tempu.

Riba  internèt ta konsehá pa uza métodonan di pago seif. Aktivá e asina yamá outentikashon-dos-faktor, kaminda  por ehèmpel bo telefon ta sirbi komo di dos konfirmashon i pèrkurá pa kontrolá riba ‘HTTPS’ den URL si e website ta seif. Usa un VPN ora di akseso na internèt via retnan públiko.

Empresanan 

Empresa- i partnernan di teknologia mester implementá sistemanan resistente pa detektá i prevení froude, segun e Banko. Usa sistemanan di verifiká adrès, kontrolnan di velosidat i kumpli ku e Payment Card Industry Data Security Standard (PCI DSS). Desaroyadónan di web mester pèrkurá pa e kambio di ruta di pago ta ekipá ku e teknologianan mas nobo, manera CAPTCHA, pa prevení froude efektivamente.

Banko Sentral ta enfatisá e importansia di kolaborashon ku tur esnan  interesá den e lucha kontra delítonan sibernétiko. Ta trahando na un lei apart pa Payment Service Providers (PSP’s), ku aktualmente ta den e prosedura di lei. E lei aki lo pèrkurá pa un kuadro di lei mas fuerte pa PSP’s.