KRALENDIJK – Hopi hende a reuní djasabra atardi pa e marcha di silensio pa Evander Candelaria, keda a bai sosegá algun dia pasá. Hendenan a reuní na Parke Tului, manera tabata palabrá i aya  un a brasa otro i duna forsa na famia.

Despues  e mama di Evander, huntu ku algun konosí a kana bai riba e pir flotante na altura di Parke Tului. Nèt na e parti kaminda momentu Evander a bira malu, e mama a resa i a pone flor algun flor na e sitio i tambe tira algun den laman. El a resa pidi señor pa protehé i laga e yu gui’e for di ariba.

Arnd Chirino, e bon amigu di Evander a dirigí palabra na tur presente i el a bisa: “Mi sa ku boso konosé Evander. E no ke pa boso ta tristu awe. El a pasa den hopi kos ku hopi lo no a pasa aden. Un persona ku ta pusha pa dilanti. Semper kla pa yuda tur hende, porta habri tur ora. Mi no tabata e mihó persona, Evander a kere den mi i mi ta ken mi ta awe. Sigui plama e informashon di loke el a hasi huntu ku nos. Kana awe i papia di dje i ekspres’é den amor. Esei e tabata kere den, no yora pero hari. Pensa i hasi loke Evander sa hasi. Ban ta huntu ban hari. Mi sa sigur ku Evander a stima tur esnan ku tabata rònt di dje.”

E grupo di hende presente a kana for di Parke Tului bai direkshon di Parke Wilhelmina i despues bai na e ofisina di Evander (26), Bonaire Medical Clinic.

Despedida

Djamars awor ta tuma despedida di e defuntu i esnan ku ta deseá por hasi un donashon, i ta bai ku e defuntu Kòrsou pa hib’e su último lugá di sosiegu. Esaki ta deseo di e mama di Evander, pa su yu ta mas serka di dje, apesar ku el a bisa ku e yu a stima Boneiru. Sigur Evander pa medio di a marcha a haña un tremendo atenshon, loke por a mira e kantidat di hende ku a presentá.