Notisia

Bèk na Boneiru: Kantante Semii Marten tin deseo di span su halanan internashonalmente

Den nos rúbrika nobo nos ta sigui personanan Boneriano ku a lanta na Boneiru, a traha òf studia den eksterior, pero despues ta bini bèk. Den e di tres seri nos a papia ku e  kantante Semii Marten ku ke span su halanan internashonalmente ku su kantika Pèrdí. Abo tin un hende òf konosé un hende ku un storia spesial? Tep redakshon.

Semii Marten a nase na Kòrsou. For di su promé aña el a muda pa Boneiru. El a lanta na e isla ei. Algu mas ku djes aña pasá el a finalisá su estudio di HAVO i a kuminsá ku un estudio na Kòrsou. Ku éksito. No solamente el a finalisá su estudio di asistente pedagógiko. Aña pasá el a finalisá su post sertifikado pedagógiko HBO. Sinembargo el a ripará hopi lihé ku e no kier a konsentrá kompletamente ainda riba un trabou den pedagogia. E pashon pa kanta, balia i duna show a keda pèrsigui Marten. E aña aki el a subi e listanan di éksito. Ku su kansion Pèrdí e tabata pa simannan largu pará na number un.

Dianan kompletamente yen

Semii Marten ta konosí pa su energia sin límite. Durante dia e ta traha na e emisora Breezy FM, anochi bo ta hañ’é den diferente restorant i madrugá e tabatin energia ainda pa studia tambe. Pa kolmo bo por hañ’é ratu ratu tambe den sala di deporte. “Aparentemente tin sufisiente ora p’ami den un dia”, segun Marten ku ta haña un sonrisa riba su kara ora hasi’é e pregunta. “Mi tabata semper motivá pa finalisá mi estudio. Mi ta kustumbrá di traha duru”.

Parse ku ta algu ku Marten a siña kaba for di chikí. Balèt, lès di djès moderno, karate i vòlibòl. Su mayornan a yud’é pa siña diferente aktividat. “Semper mi tabatin un planifikashon. Henter siman tabata yen. Ta p’esei mi ta pensa ku awor mi por manehá un skema drùk bon tambe”, segun Marten.

Shownan spesial

Esun ku ta pensa ku ora bo bai presensiá un presentashon di Semii Marten, bo ta haña un kantante lokal steif i ku ta kanta falsu, bo ta sali engañá. E energia, su pashon i su bunita kanto ta duna e wéspetnan riba e isla un bunita eksperensia. Pa Marten esei ta algu ku e ke destaká den dje tambe. “Mi pashon ta duna presentashon i músika. Mi ta ripará ku duna presentashon ta den fase inisial  ainda na Boneiru. Duna show ta kosta mas energia. Hendenan mester siña komprondé esei ainda aki na Boneiru. Sinembargo mi ta gusta hasi esaki. No ta bai pa e kantamentu so, pero tambe pa baile i pues henter e show”.

Habri kaminda internashonal 

E Marten energétiko no ta hasi’é pòrnada. Ku su kansion Pèrdí el a gana mientrastantu kurasonnan di hopi fanátiko riba e isla. Pero no na Boneiru so. Den otro paisnan tambe ta toka su kansion.

“Mi ta haña mensahenan di personanan ku ta dunami kòmplimènt. Ta mensahenan di hendenan ku mi no konosé. Loke ta remarkabel ta ku hopi biaha ta mensahenan di hendenan di Merka i Hulanda. Sa uza e kansion tin biaha komo e promé baile na un kasamentu. Tambe mi ta haña hopi biaha e petishon si mi no ke bin Hulanda pa aktua un biaha einan. Mi ta pensando seriamente den e direkshon ei”, segun Marten.

Su kansion Pèrdí a subi listanan di éksito na Boneiru. Pa hopi tempu e tabata pará komo number un riba lista di klasifikashon di Mega Hit FM. Ta promé biaha ku un kansion skirbí na papiamentu ta pará na number un. Dos músiko di Kòrsou a traha e kansion aki.

Pèrdí: 

E kansion Pèrdí ta trata deseo, warda i speransa. E kantante ta pidi pa tempu pasa pa e por ta serka su namorado. E ta papia di e deseo pa ta huntu, e difikultatnan di warda i e speransa ku nan amor finalmente lo vense tur duda. Ta trata tambe tokante e pèrdida di fe i e anhelo pa wak otro pa siña huntu i keda komprondé otro. En general e parse un reflekshon emoshonal riba e desafio- i deseonan di amor i relashon.

Ehèmpelnan 

,,Michael Jackson i Beyonce ta mi inspirashonnan grandi”, segun Marten. “Bo ta mir’é bèk tambe den mi shownan. Bo por mira sierto karakterístikanan di ámbos artista bèk den mi shownan. Pues kanto i baile. Nò, mi no ta hasi e moonwalk di Michael Jackson si nò. E ta duna show si, manera ami tambe lo tabatin gana di duna. E ta grandioso. Whau! Esei ta e kaso serka Beyonce tambe. Ámbos tin un vishon mas grandi. No ta bai pa e kansion so, ta henter e show”.

Festivalnan na Hulanda

Podisé un karera internashonal ta vislumbrá pa e kantante ku bo por topa tur dia den un di e resort- òf restorantnan na Boneiru. Marten, ku tin hopi ambishon, ta laga sa lo siguiente: “Mi ta pensando si pa bai entamá proyektonan na Hulanda. Lo mi ke hasi esei pa algun siman. E wer ta strobami pa bai biba mes einan. No esei so. Na Boneiru mi tin bon kontakto ku e resort- i restorantnan. Den un otro pais mi mester bai desaroyá esei ainda. P’esei no ta fásil pa muda pa Hulanda. Lo mi a haña leuk pa por kanta por ehèmpel den un festival. Esei i mi soño pa lansa mas number internashonal ta loke mi ke bai p’e”.

Deel dit artikel
Rocargo
Rocargo
Rocargo
Rocargo