KRALENDIJK- Djasabra ku a pasa The Bucket na Playa a organisá su evento anual di “haringparty”, kaminda a bende e promé hèmber di haring na Boneiru na findishi, pa asina rekoudá fondo pa Banko di kuminda Boneiru.

Di e forma aki, e promé “Bucket” di haring a bende pa e suma impresionante di 2.350 dòler.

Den un gesto bunita, e ganadó di findishi, Panadero Trading, a disidí pa duna e hèmber bèk, di forma ku por a bendele un biaha mas na findishi.  E dos findishi aki a yega generá 1.000 dòler adishonal, ora LOT 1038 tabata esun ku a gana e findishi.

Di e forma aki, a yega na un dohashon total pa Voedselbank Bonaire di no ménos ku 3.350 dòler.

Voedselbank Bonaire a bisa di ke gradisí tur persona ku a duna un kontribushon na e evento aki. E suma rekoudá lo bai kompleta pa e aktividatnan di Voedselbank Bonaire. Den e kaso aki, e montante ku a generá lo ser usá specifíkamente pa apoyo di mucha ku ta bai skol ku ta dependé di e bank di kuminda.

Pa medio di e fundashon, Banko di Kuminda Boneiru por sigurá ku muchanan di famia menos pudiente tin akeso na kuminda saludable i nutrivo, ku ta esensial pa nan kresementu, desaroyo i prestashon escolar.

Patrosinadó

Voedselbank Bonaire a enfatisá ku ta danki na tur patrosinadó ku a logra un resultado asina. Pa e motibu ei a bai un danki spesial na Luciano, The Bucket, Cuba Compagnie,  Ons Broodje, Epic Tours, Lady Bellaïs, Bonaire Cruisers i Salty Seafood.