WILLEMSTAD – A hasi uso di un tim di 28 empleado di Securitas-Impacto pa fungi seis siman largu komo guia di eventonan. E asina yamá anfitrionnan di seguridat tabata nesesario pasobra tin un falta grandi di personal. 

E agènda di evento ta hopi yen na Hulanda e verano aki. Asina yen ku tin falta di bewaker pa por ehèmpel asistí na North Sea Jazz Festival na Rotterdam, Pinkpop na  Geleen i konsiertonan di The Rolling Stones ku ta hopi den publisidat.

P’esei TSC Crowd Management na Hulanda a buska koperashon ku Securitas na Kòrsou pa reforsá na tempu e tim na Hulanda riba un base temporal.

Securitas i Impacto a forma un tim na Kòrsou. TSC Crowd Management a perkurá pa e entrenamentu di e anfitrionnan di seguridat. E entrenamentu tabata konsistí di tópikonan manera asistensia na empresanan, evakuashon i koperashon ku servisionan di emergensia. E tim di Kòrsou seguidamente a buta den práktika e loke ku nan a siña durante seis siman na Hulanda i tur ta sertifiká awor.

Eksperensia

Direktor di Securitas Paul de Kloet ta mira ku gran satisfakshon bèk riba e proyekto. “E miembronan di tim a presta hopi bon. Nan ta sertifiká awor i nan tin un eksperensia mas.  E magnitut di e eventonan ta impreshonante. Tabata algu fantástiko pa e 28 koleganan pa forma parti di e organisashon TSC durante e tantísimo konsierto- i eventonan ku un averahe di 50.000 bishitante.”