Aerolinea i biahamentu

BIA ta bai kambia situashon di tráfiko i tin atenshon pa e problema di stashonamentu malu

Tin momentunan ketu, pero tambe tin momentunan hopi drùk, kaminda hende ta stashoná outo unda ku ta. Pòtret: ABC Online Media

KRALENDIJK – Despues di un periodo di konstrukshon, BIA huntu ku Dabboussi Real Estate ta remodelando e tereno entre ámbos edifisio. E partidonan a koordiná ku otro kon ta bai integrá i strukturá e diferente partinan di e kaminda pa logra un separashon opvio di e diferente moveshonnan di tráfiko. Entrante djaluna benidero e trabounan akí ta kuminsá. Ta pidi usuarionan di e karetera pa tene kuenta ku esei.

Finalmente e struktura ta bira di tal forma, ku loke na e momentunan akí ta e kaminda prinsipal, aweró ta bira parti di e sekshon pa Kiss&ride. Kiss&Ride ta grátis i ta destiná pa laga pasaheronan subi i baha mesora. No ta permití pa parker akinan. Taxi- i bùsnan tambe por haña un lugá akinan. Na banda di Kiss&Ride ta bin e karetera prinsipal, ku den su banda un parti pa e kompania di outo di hür. 

Ya for di 2008 BIA konosé parkermentu pagá. E Kiss&Ride ta e alternativa grátis ku a introdusí despues ku na 2020 BIA a hañ’é obligá di eliminá e parkermentu grátis pa sinku minüt. Hopi hende ku tabata parker, sin ku tabata nan intenshon, hopi bia tabata violá e tempu tòg i mester a paga ora di sali, loke tabata pone ku tabata blòkia e salida. Esnan ku si a paga pa parker, mester a warda riba nan i tabata surpasá e tempu di salida i mester a paga èkstra tambe aserka. Esaki tabata okashoná hopi inkombeniensia i tabatin un influensia negativo riba e fluho di tráfiko. 

Amplia

BIA ta ampliando tambe su lugá di parker pa personal. Pa esaki a drecha 28 lugá di parker èkstra. E trabounan akí ta kasi kla. Kolaboradónan ku ta traha na aeropuerto por parker einan ku akseso na e sitio  pa parkermentu largu, ora e lugá di parker di personal ta yen. Di e forma aki tin mas lugá di parker ta bira liber pa esnan ku ta buska òf hiba hende. Ta usa e ora ei e aktual lugá di parker di e kompania di outo di hür solamente pa outonan di hür. 

E trabounan lo por kousa algu di inkombeniensia. BIA ta pidi su diskulpa di antemano pa esaki. Ademas BIA kier señalá ku semper ta posibel tambe pa parker kòrtiku riba e tereno pa parkermentu largu. Temporalmente BIA ta ofresé parkermentu largu grátis te ora tur kos ta kla. Pa parkermentu kòrtiku e tarifa normal ta na vigor. 

Personal

BIA ta kontrolá riba parkermentu diariamente i ta kontratá èkstra personal pa hasi esaki, partikularmente riba djárason mèrdia i djasabra ku ta hopi drùk. Lástimamente no ta tur hende ta tene nan mes na e reglanan i si ta nesesario lo pidi Marechaussee pa aktua. 

Deel dit artikel
Rocargo
Rocargo
Rocargo
Rocargo