KRALENDIJK – Biblioteka Públiko Boneiru ta organisá djasabra 9 di mart 2024 un treinen úniko i grátis di ‘lesa pa mucha’ pa mayornan di muchanan den e edat di 0-4 aña.  

Durante e treinen mayornan ta siña kon nan por lesa pa nan yu na un manera alegre. I kon nan por imitá zonido ora nan ta lesa, òf di un otro manera por usa nan stèm.  E treinen ta di 15:00 or te 16:00 or. Pa e treinen, mayornan por inskribí via meil na [email protected] òf yama 715 53  44.

Jennifer Pocornie-Martis ta hefe di Biblioteka Públiko Boneiru. E ta splika dikon ta bon pa mayornan lesa pa nan yu. “Pa desaroyo di idioma di mucha den e edat di 0-4 aña ta hopi importante ku mayornan ta lesa pa nan yu.  Awor tin buki pa mucha di 3 luna  ku mayornan por usa ora nan ta lesa pa nan yu. Mas tempran komo mayor bo kuminsá ku lesa pa bo yu, mas mihó esei ta pa bo yu. Ta importante ku tata i mama ta lesa pa nan yu, esei ta bon pa e laso entre mayor i yu. Mi ta hopi kontentu ku nos por ofresé e treinen di lesa pa yu i mi ta spera ku hopi tata i mama ta partisipá.” 

E treinen ta forma parti di e programa ‘Komienso ku Buki na Akohida pa Mucha.’  Den e programa akí, e  biblioteka na Boneiru ta traha estrechamente huntu ku Biblionet Groningen i Nederlandse  Stichting  Lezen. Gonny Apol di Biblionet Groningen ta duna e treinen na Biblioteka Públiko na hulandes,  tin tambe un eksperto lokal presente pa duna splikashon na papiamentu. “Durante e treinen, mayornan ta haña entre otro fragmento di filmashon pa mira. Nos tin tambe ehèmpel di buki na papiamentu pa mucha hopi chikitu.  Ta hopi importante ku mayornan ta lesa pa nan yu den nan idioma materno,” asina Apol ta splika. 

Regalo 

Despues di e treinen, mayornan por inskribí nan yu gratuitamente komo miembro di biblioteka. Ku e karchi di biblioteka grátis ku nan ta haña, mayornan for di e momentu ei por fia buki.  Mayornan ta haña tambe un maleta chikitu di Boekstart ku tres buki aden.