KRALENDIJK- Riba djabièrne un grupo di boluntario a yuda Elsmarie Beukenboom ku su proyekto di Reforestation Project Klein Bonaire pa prepará pa plantashon di mas palma na Klein Bonaire.

Algun tempu pasá Beukenboom a anunsiá e intenshon di bai planta no ménos ku 500 Palma di Kabana na Klein Bonaire. E Palma di kabana (Sabal Palm) ta un sorto di palma ku ta endémiko na Boneiru. Esaki ta nifiká ku ta un tipo di palma ku ta di Boneiru originalmente.

Klein Bonaire Reforestation Project ta un proyekto den kua Beukenboom, BonBèrdè i STINAPA Bonaire ta kolaborá pa logra konbertí Klein Bonaire den un área mas bèrdè. Den pasado a planta diferente palu di fruta, ku a kondusí na mas para ku ta brui riba e isla.

Preparashon

Plantamentu na Klein Boneiru no ta fásil. E boluntarionan a traha riba trahamentu di buraku pa prepará e plantamentu di e palmanan. Tambe a trese bòter di awa ku a pone banda di kada buraku, pa por muha e palmanan te dia nan ta sufisientemente fuerte pa sobrebibí riba nan mes.

E boluntarionan ku a duna un man tin eksperensia ku plantamentu di Palu di Mangel na kosta di Boneiru, bou di e nòmber mangrove maniacs.