KRALENDIJK- Riba djasabra den un evento di gala virtual, a tuma lugá e seremonia di koronashon di Boneiru su promé Miss Teen Universe den persona di Marjely Doran na Van der Valk Plaza Resort Bonaire.

Marjely tin e tarea di representá Boneiru na e sertámen mas grandi i importante bou di nos hóbennan mundialmente.

Na luna di òktober 2021, direktiva di Fundashon Bonaire International Art & Talent Academy (BIATA), tabatatin un asina yamá “Casting Teen Universe Bonaire” kaminda dos damita a asistí i asina a skohé Boneiru su máksimo representante hubenil.

Mesora preparashonan a kuminsá pa ku e proyekto aki ku ta kulminá dia 5 mei 2022 kaminda Boneiru lo ta bon representá na Managua, Nicaragua.

Bon prepará

BIATA ta konvensí ku Marjely ta bon prepará pa asina hasi un bon papel mirando e invershon den un preparashon bon balansá ku ta konsistí di 7 luna ku a dediká na e proyekto aki. Marjely a risibí diferente lès i charlanan e.o. etiketa, mundu di beyesa, pasarela, “Public Speaking”, sekshon di potrèt i tambe konosementu general kaminda e lo tin ku bai amplia riba un tópiko sosial, mirando ku e sertámen ta buska mas ku simplemente beyesa, pero un hóben empoderá ku ta un lider den su komunidat i por ta un bos pa un kambio sosial.

Aktualmente BIATA ta invitando damitanan di Boneiru entre 14 pa 18 aña di edat pa inskribí pa e temporada di “Miss Teen Bonaire 2022” kaminda nos lo bai sigui forma  hóbensitanan ehemplar i ku oportunidat di representá Boneiru internashonal.