KRALENDIJK – Aña pasá Tourism Corporation Bonaire (TCB) a firma un akuerdo di kolaborashon ku Guardian Group Fatum (GGF) pa konhuntamente lansa un inisiativa edukativo pa komunidat boneriano, titulá ‘The Bonaire Tourism Scholarship Program’. 

Komo parti di TCB su obhetivonan di turismo ta pa eduká i inspirá e komunidat boneriano, a desaroyá e programa aki pa mehorá nos profeshonalnan den e industria di turismo. Na 2022, en total nos a risibí 59 registrashon, i tabatin total 19 kandidato ku a bini na remarke. Nos ke sigui enkurashá nos komunidat pa probechá di e oportunidat úniko aki pa por sigui desaroyá nan abilidat.

E aplikashon pa e programa ta habri for di awor aki te ku 9 di yüni 2023. Pa registrá i pa lesa mas tokante e tremendo inisiativa akí, bai riba www.bonairescholarship.com

Tokante e programa

E Bonaire Tourism Scholarship Program ta yuda funda kursonan individual di desaroyo profeshonal i kursonan akadémiko fultaim riba tur tereno di Hospitalidat i Maneho di Turismo pa programanan riba nivel di Associate (MBO), Bachelor i Master. E beka di estudio ta hasi posibel pa studiantenan i no-studiantenan meritorio pa alkansá nan metanan edukativo i profeshonal i pa realisá nan soño. Ademas e programa di beka di estudio ta hasi posibel pa e partisipantenan pa hasi uso di e posibilidatnan pa kontinuá ku nan desaroyo profeshonal. E beka di estudio akí ta un medio efektivo tambe pa mehorá tumamentu den servisio di hendenan lokal i stimulá preservashon i kresementu profeshonal den sektor turístiko di Boneiru.

Den kolaborashon ku GGF, TCB lo otorgá bekanan di estudio individual na minimalmente 10 partisipante pa kada aña akadémiko. E bekanan di estudio ta funda entre $200 te ku $3000 pa kada aña akadémiko, dependiente di e tipo di programa ku e partisipante skohe i e partisipantenan lo risibí esaki den e promé aña di nan estudio. Ta otorgá e bekanan di estudio solamente pa paga e estudio i ta entregá e sèn direktamente na e universidat òf ‘hogeschool’. E beka pa estudio akí no ta un beka pa paga e gastu di estudio kompleto, e partisipantenan pues tur aña di nobo tin ku hasi un petishon pa risibí e beka di estudio.

Pa mas informashon por bishitá www.bonairescholarship.com òf tuma kontakto ku marketing@bonaireisland.com.