KRALENDIJK – Bon aña, happy New Year! Aña 2023 ta bira e aña di adelantonan konsiderabel i oportunidatnan igual pa e munisipionan Karibense di Hulanda? Esaki ta e deseonan di aña nobo di diferente habitante i polítikonan na Boneiru, Saba i Sint Eustatius, John Samson & Marit Severijnse di Caribisch Netwerk ta skirbi.

“Di mi parti pa yega mas lihe posibel na un trato igual pa habitantenan di Hulanda Karibense”, gezaghèber Edison Rijna ta bisa na komienso di e aña nobo.

“Esei ta nifiká ku nos mester traha den un tempu rápido pa yega na un sistema sosial adekuá. Igual ta nifiká tambe: trato igual pa desaroyo pa tur hende i pa tuma parti kompleto na komunidat.”

Elekshonnan na mart

Aki tres luna, riba 15 di mart, tin elekshon kaba na Boneiru, Saba i Sint Eustatius pa Konseho Insular. Ku kambio di aña tempu di kampaña tambe ta ranka sali.

“Mi ta spera ku e partidonan ku ta tuma parti na elekshon lo hiba un kampaña na un manera onesto ku mente habrí  i dirigí riba kontenido. Òf mihó bisá: wak e kousa, no e hende”, gezaghèber Rijna ta bisa. “Por supuesto ku esaki  no ta konta pa polítika so.”

Komportashon riba media sosial

E gobernantenan mas haltu di Saba i Boneiru ta para awe ámbos ketu na e komportashon di personanan riba medianan sosial. Nan ta haña ku lo ta un bon kos si e aña aki hendenan por ta poko mas amabel ku otro onlain.

“Media (a)sosial ta pèrkurá desafortunadamente pa mas polarisashon”, gezaghèber Jonathan Johnson di Saba ta opiná. “Pero enbes di sintonisá ku otro onlain, nos mester pasa mas tantu tempu di kalidat huntu ku hendenan rondo di nos.”

“Laga nos ta mas kariñoso ku otro. Tambe riba medionan sosial”, e gezaghèber Boneriano ta bisa. “Boneiru ta un punta chikitu den un mundu turbulento. Pa konstruí un bon futuro pa un i tur nos mester di otro definitivamente.”

‘Protehá loke ku ta hasi nos úniko’

“Mi deseo pa e pueblo di Saba en partikular ta pa vigilá e oportunidatnan ku ta ofresé i wak bèk di unda nos a bini,” Johnson ta bisa. “Nos isla a kambia e último añanan i kambio ta un echo, pero nos mester protehá tambe e loke ku ta hasi nos úniko.”

“Mi deseo pa e personanan ku ta biba den nos Reino ta ku nos ta siña mas di otro i skucha otro mas. Apesar di e tantísimo kambionan ku sierto personanan ta eksperensiá riba nos islanan, ta nos responsabilidat pa yuda personanan den nesesidat.”

‘Laga nos tene na e lokenan ku ta uni nos’

Komisario di gobièrnu Alida Francis ta hopi optimista pa Sint Eustatius. “Apesar di e desafionan ekonómiko mundial di 2022, Statia por ta enormemente orguyoso di tur loke ku nan a logra.”

“Mi deseo pa 2023 ta ku nos ta tene mas na e loke ku ta uni nos i pone atenshon riba e loke ku nos tin en komun. Esei ta e kaminda pa adelanto berdadero, e kaminda pa sigui desaroyá i e kaminda pa un Statia mas próspero.”