Boneiru e aña aki ta bolbe bèk na DEMA show

KRALENDIJK- E aña aki un delegashon di Boneiru lo bolbe bèk na DEMA Show, ku ta e evento mas importante na mundo pa esnan ku ta biaha pa praktiká e deporte di sambuyamentu. 

E show e aña aki ta tuma lugá na Las Vegas, Nevada entre dia 16 i 19 di novèmber 2021, na Las Vegas Convention Center.

Despues ku aña pasá pa motibu di e pandemia a kanselá e evento, TCB huntu ku BONHATA i otro partnernan a prepará pa partisipá na evento di e aña aki.

E siguiente partnernan ta presente na e show di e aña akí: BONHATA, Buddy Dive Resort, Captain Don’s Habitat, Courtyard by Marriott, Divi Flamingo Beach Resort, Grand Windsock, Plaza Beach & Dive Resort, Resort Bonaire, Tourism Corporation Bonaire i VIP Diving.

Paviliun

E aña akí Paviliun Boneiru (Bonaire Pavilion) ta situá pegá ku entrada prinsipal di e sala di bolsa, di manera ku bishitantenan, bendedónan i partnernan komersial ku ta bini e bolsa, no por keda sin mira nos Paviliun Boneiru. Banda di esei tin tambe un ‘área di hospitalidat’ den Paviliun Boneiru, diseñá ku e ‘look & feel’ di Boneiru, kaminda bishitantenan, bendedónan i partnernan por sinta, relahá i/òf tene un enkuentro ku partnernan komersial.