Kralendijk – Djamars atardi Entidat Públiko Boneiru (EPB) i gobièrnu di Aruba a firma un Memorando di Akuerdo (Memorandum of Understanding – MoU) ku kua durante e tres añanan binidero e partidonan ta bai hasi esfuerso pa yega na un kolaborashon estrecho pa loke ta trata realisashon di un sitio seif pa víktima di violensia doméstiko i maltrato di mucha. Resientemente na Boneiru a duna  señal di inisio pa konstrukshon di e Family Justice Center (FJC) boneriano. 

E kolaborashon entre e FJC na Boneiru i e FJC na Aruba ta pèrkurá entre otro pa asignashon di rekurso, manera organisashon di treinen, seminario i enkuentro den koperashon estrecho ku otro inisiativanan den área karibense i hulandes, pero e ta regla  tambe interkambio di konosementu i eksperensia pa medio di programanan di interkambio. 

Rekonstrukshon

Siman pasá a duna señal di inisio pa rekonstrukshon di e anterior sentro di bario na Antriol i konbertié den e FJC boneriano, ku na Boneiru ta bai karga e nòmber ‘Sentro pa Seguridat di Famia’. Un laso di kolaborashon entre e diferente partnernan den e kadena ku tin di haber ku e tópikonan violensia doméstiko, maltrato òf eksplotashon. Via un presentashon 3D e presentenan por a haña un impreshon di e futuro edifisio.

Diputado Nina den Heyer a papia ku e habitantenan di bario i e partnernan di kadena: ‘Mi ke gradisí tur hende ku a kere den e proyekto akí i a hasi esfuerso pa realisá tur esaki. Nos tur sa kon doloroso por ta pa un víktima, pa serka kada instansia e tin ku konta su storia kada biaha di nobo. Ku binida di e Family Justice Center esaki no ta nesesario mas. Awor akí den un solo biaha e víktima por haña e ayudo adekuá.’ 

Paso mas aleu

El a indiká mas aleu ku durante e periodo tras di lomba a duna atenshon kompleto na e kolaborashon entre e tim i e partnernan di kadena, pa medio di entre otro partisipashon na e treinennan konhunto. ‘Ku binida di e edifisio akí nos ta un paso mas aleu den e kolaborashon akí’, segun Den Heyer den su diskurso. Na Boneiru entrega di e Family Justice Center lo tuma lugá den e di dos mitar di aña 2023.