KRALENDIJK- Tourism Corporation Bonaire (TCB), en koperashon ku enviado spesial pa Boneiru Edison Rijna, Holland House, Embahada di Reino Hulandes, BONHATA, i Aeroporto Internashonal di Boneiru (BIA), a organisá un mishon komersial di dos dia pa Bogotá, Kolombia, riba 31 di yanüari i 1 di febrüari, ku meta pa establesé un konekshon aéreo direkto entre Bogota i Boneiru. 

TCB a tuma riba nan un investigashon komprehensivo durante e dos añanan pasá, inkluyendo análisis di datonan di mobilidat, estudio di inventario di kamber, i estudio di merkado, indikando ku Boneiru ta kla pa un konekshon manera esaki. 

A pesar di falta di buelo aéreo direkto i merkadeo dirigí, datonan resien ta mustra ku Kolombia ta un merkado importante pa Boneiru, ku a result den e tòp 10 di merkadonan di orígen na 2023. 

Avansá

E delegashon bou di liderazgo di Rijna a enfoká riba avansá e meta aki. TCB i su partnernan ta komprometé na un diálogo kontinuo i esfuersonan di invershon pa konektá Boneiru ku hùbnan prinsipal na Sur Amérika den e lunanan benidero.