KRALENDIJK- Tourism Corporation Bonaire (TCB) a anunsiá ku Boneiru su partisipashon na DEMA Show 2024 lo ku ta tuma lugá for di 19 te ku 22 di novèmber na Las Vegas – Nevada den Las Vegas Convention Center. 

TCB ta preparando su mes huntu ku su partnernan na nos isla pa representá Boneiru na e show di e aña akí. Den e EBonaire Pavilion lo ei presente Bonaire East Coast Diving, Buddy Dive Resort, Captain Don’s Habitat, Chogogo Beach & Dive Resort, Corallium Hotel & Villas Bonaire, Delfins Beach Resort, Dive Friends Bonaire, Divi Flamingo Beach Resort, Grand Windsock Bonaire, Plaza Beach & Dive Resort, Tourism Corporation Bonaire i VIP Diving. 

Bonaire Pavilion ta ofresé konsumidónan un oportunidat pa drenta den kontakto ku partnernan na nos isla i pa eksplorá Boneiru su sitionan bírgen di buseo, algun di e último sitionan realmente bírgen pa eksplorashon bou di laman. 

E aña akí un biaha mas Boneiru a drenta den kolaborashon ku ScubaRadio, pa duna bishitantenan di e DEMA Show un oportunidat pa gana premionan fantástiko, entre otro vários aventura di buseo i estadia durante un siman, kortesia di e partnernan ku ta partisipá. 

Orlando

E siman akí TCB ta bai manda un email pa diferente partner pa partisipá na e DEMA Show 2025, ku ta tuma lugá na Orlando, Florida.