Boneiru su programa di desaroyo den barionan ta sigui

Kralendijk – E trabounan ku ya a kuminsá na e Sentro di bario Nikiboko ta un ehèmpel ku Entidat Públiko Boneiru ta sigui ku su programa di desaroyo den barionan na Boneiru.

E asina yamá Desaroyo Integral di Bario (Integrale Wijk Ontwikkeling) ta pa mehorá bida i bibiendanan den barionan. E proyekto Desaroyo Integral di Bario (IWO) ta kai bou di direktorado di Komunidat i Kuido. Resien a tuma e desishon pa buska un persona pa sigui trèk e proyektonan.

Ta e intenshon pa sigui sostené e habitantenan i plataformanan di bario na un manera konstruktivo. Asin’ei tambe ta sòru ku esnan ku ta biba den e bario ta haña sosten pa realisá aktividat i drecha nan kondishon di bida den nan bario. Un otro parti di e Integrale Wijk Ontwikkeling (IWO) ta pa for di Entidat Públiko Boneiru yuda drecha e kondishonnan di bida den e barionan.

Akuerdo

Resien diputado Nina Den Heyer a firma un akuerdo ku Fundashon Cas Boneriano pa pone atenshon i hasi mantenshon na e sentronan di bario na Nort’i Saliña, Amboina, Tera Kòrá i Antriol /Family Justice Center.Den tempu binidero lo sigui sostené e plataformanan den bario pa asin’ei sòru ku e habitantenan ta satisfecho ku e bario ku nan ta biba aden. Lo sostené e inisiativanan pa tin deporte i spèl den barionan. Esaki ta importante pa esnan grandi por haña tempu pa dibertí. Pa esnan mas chikitu i hóben lo tin aktividat espesial awor ku fakansi ta dilanti porta.