Kralendijk – Seis organisashon a disidí pa uni forsa pa intensivá e lucha kontra kriminalidat organisá na Boneiru. Ministerio Públiko BES, Kuerpo Polisial Hulanda Karibense, Warda Kosta Region Karibense, Koninklijke Marechaussee, Duana i Entidat Públiko Boneiru a firma un deklarashon di intenshon pa kuminsá un asina yamá relashon di koperashon multidisiplinario.
Gezaghèber i alabes e persona ku a bini ku e inisiativa, Edison Rijna, ta papia di un paso importante pa hasi Boneiru mas seif. ‘Naturalmente nos ta traha huntu kaba relashoná ku sierto insidentenan. Pero un koperashon struktural ta nesesario pa realmente forma un moketa kontra kriminalnan profeshonalmente organisá, pa asina servisionan di investigashon por aktua na un manera proaktivo tambe. Nos ke hasi Boneiru mas inatraktivo posibel pa hende i organisashon ku intenshon maligno.’
Konkretamente e koperashon ta bira realidat den forma di e asina yamá ‘Multidisciplinaire Maritieme Hub Bonaire – MMHB (Punto Sentral di Konekshon Marítimo Multidisiplinario Boneiru). Na Waf Nello Craane lo instalá un punto di sosten na benefisio di e servisionan ku ta traha huntu. For di einan patruya marítimo por tuma lugá, pero tambe ehekushon di operashon di ‘search and rescue’ (buska i salba). Banda di espasio pa mara boto, den bisindario direkto ta ekipá un ofisina tambe. E aspirashon ta pa kuminsá hasi uso di e fasilidat aki na luna di ougùstùs di otro aña. Interkambio di informashon tambe ta forma parti di e koperashon.
‘Nos pensamentu no mester ta asina inosente pa kere ku organisashonnan kriminal no tin atenshon pa Boneiru. Pa hopi aña kaba mi tin preokupashon relashoná ku señalnan ku mi ta haña ku gremionan robes ta laga nan bista kai riba Boneiru. Mi preokupashon a keda konfirmá den e ‘Geïntegreerde risicoanalyse Caribisch Nederland’ (Análisis di riesgo integrá Hulanda Karibense) di ‘Analistennetwerk Nationale Veiligheid’ (Ret di Analista Siguridat Nashonal) ku nan a publiká na luna di mei aña pasá. Den e dokumentu aki nan ta atvertí pa efektonan dañino, por ehèmpel efektonan ku ta perhudiká nos estado di derecho demokrátiko i ku ta destabilisá nos komunidat.’
E aktividatnan kriminal ku e investigadónan a identifiká ta relashoná ku entre otro negoshi i kontrabanda di droga, arma i hende, i tambe labamentu di plaka ku kriminalnan a gana ku e aktividatnan aki. Un gran parti di esaki ta tuma lugá den e ámbito marítimo. Kada un di e partidonan ku a firma e deklarashon di intenshon, durante e último añanan a oumentá nan atenshon pa e sektor aki. Pero kada un riba su mes a yega na e konklushon ku lo tin mas efektividat si bini mas koherensia den nan aserkamentu.
Un grupo di proyekto konhunto ta bai prosesá e plan mas aleu. ‘Huntu nos a ekspresá e ambishon pa den e añanan binidero mehorá e kontròl di frontera marítimo di Boneiru fuertemente. Influensianan no-deseá for di gremionan kriminal no tin mag di haña un chèns na nos isla. Siudadanonan, empresarionan i bishitantenan mester por sinti nan mes seif’, segun gezaghèber Rijna.
Lesa tambe:
Tim Muller direktor nobo di Rijksdienst Caribisch Nederland
TCB ta sigui gaña tokante Visitor Entry Tax
17% di oumento den turista en luna di òktober
QR–code òf resultado di tèst nesesario den futuro pa bishitá evento
