KRALENDIJK – Gobièrnu di Boneiru ta preparando introdukshon di un impesto nobo pa turista. Bou di e sistema nobo, tur turista ku ta bishitá e isla lo tin ku paga 50 dòler, promé ku nan yegada. 

E impuesto sinembargo lo mester wòrdu pagá un solo biaha pa aña, den kaso ku un turista ta drenta i sali mas biaha durante un aña. 

Tarifa spesial

Tin un eksepshon den e tarifa nobo pa tur habitante di e otro islanan Hulandes den Karibe. Esakinan lo paga 10 dòler na impuesto. Esaki tambe lo mester wòrdu pagá solamente un solo bes. Un hende ku drenta i sali kada bes, lo no mester paga atrobe. 

Un tarifa spesial lo tin tambe pa mucha te ku 12 aña tambe. Residentenan di Boneiru, lógikamente, no tin ku paga nada pa drenta nan isla. 

Aprobashon

E areglo nobo di impuesto pa turista lo mester risibí aprobashon di Konseho Insular, promé ku e por drenta na vigor. Gobièrnu i TCB ta spera ku e sistema nobo por wòrdu implementá entrante promé di yanüari 2022. Un impuesto mas haltu pa turistanan di barku krusero, lo bai drenta na vigor den sèptèmber 2022. 

E impuesto nobo no nesesariamente lo mester ta mas karu pa e turista. Bou di e plan lo abolí e Sistema di Room Tax i tambe Carrental Tax. “Mira di e sistema ta pa tur bishitante di e isla kontribuí algu, tambe esnan ku ta bai keda na kas di famia òf esnan ku ta keda den un apartamentu ku awor aki no ta registrá pa Room Tax”, asina direktor di TCB, Miles Mercera a splika.