KRALENDIJK- Boneiru ta bai haña un bario nobo riba kaminda di bai Sorobon. E bario nobo ta bai haña nomber Suikerpalm. E ta bin banda di e bario ku ta konosí kaba komo Sabal Palm.

Mientrastantu Kadaster a kuminsá ku e midimentu nesesario pa por kuminsa bende tereno i kuminsá konstrukshon. Te asina leu sinembargo tin poko informashon tokante e bario nobo. No ta konosí kuantu kas lo bai konstruí, ni ki tipo di vivienda.

Bonaire.nu a purba tuma kontako ku director di departamentu di R&O, pero no a logra drenta den kontakto kuné pa mas informashond i parti di Gobièrnu di Boneiru.

Skarsedat

Echo si ta ku tin un skarsedat enorme na Boneiru pa loke ta trata di kas, pa sea kumpra òf hür. Mester bisa tambe ku a preis pa hür kas dentro di poko a subi drástikamente. Mas i mas ta mira apartement di 1 kamber ku ta ofresiendo riba internèt pa preisnan di 800 dòler bai ariba.

Pa un kas di 2 òf 3 kamber, no mueblá, ta pidiendo preisnan di 1200 pa 1400 dòler.

Fundashon Cas Boneriano ta ehekutando su plan di konstrukshon di 500 viviendo sosial, pero e konstrukshon no ta bai mesun lihé ku kresementu di poblashon. Banda di esaki, ya pa hopi aña tin lista di espera di hende ku ta buskando un kas (pagabel) pa biba den dje.