Boneiru ta haña un ‘pisina natural’ na Parke Tului 

KRALENDIJK – Pronto Boneiru ta haña un ‘pisina natural’ den laman. Pa e motibu aki Parke Tului lo ta será pa trabounan ku tin ku hasi pa dos siman. E trabounan ta kuminsá for di 7 di ougùstùs benidero i lo realisá nan den 4 fase. Den e promé fase lo realisá un pisina den laman.

For di un investigashon ku e instituto di deporte Indebon a tene bou di alumnonan di skol básiko a sali na kla ku pa loke ta trata akividatnan di deporte i movishon nan ta sinti falta mas tantu di landamentu. “Ku e pisina aki den laman nos ta krea mas posibilidat pa e muchanan i por amplia e landamentu eskolar”, segun Terrence de Jongh di Indebon. Rònt di  un superfisie di 20 x 25 meter  lo pone flur di palu ku ta drif, di moda ku ta bira mas fásil i seif pa instruktornan duna lès na muchanan.

Durante e preparashonnan pa pone e pisina den laman a tene konsulta ku STINAPA.  Ta bai tuma medida pa e pisina den laman no daña e parke supmarino. Ora e pisina den laman ta kla e maneho i mantenshon lo kai bou di Indebon.

Den e di dos fase di e proyekto lo pone un rampa pa ròlstul. E pisina den laman lo ta aksesibel tambe pa personanan den ròlstul i personanan ku ta ménos movibel. E di tres fase di e proyekto ta renobashon di e ekipo rekreativo di Parke Tului. Den e último fase lo traha riba e sitionan di stashoná outo banda di e parke i e situashon di tráfiko. No ta konosí ainda ki dia ta kuminsá ku e fasenan aki.