Kralendijk- A pesar di e echo ku e proseso di bakunashon a kuminsá poko poko i inisialmente tabata tin hopi hende ku a duda si nan lo a bakuná òf no, Boneiru ta kanando basta dilanti pa loke ta trata e porsentahe di poblashon ku a bakuná kaba kontra di Covid-19.

Esaki, spesialmente, ta e kaso si hasi komparason ku otro paisnan na kontinente Merikano. Dos pais ku ta esnan ku regularmente ta wòrdu menshoná den e kuadro aki ta Merka i Chile. Sinembargo, na Boneiru tin mas hende ku a risibí e promé i tambe ámbos bakuna, kompará ku e dos paisnan aki.

Kaminda ku na Chile 63% di poblashon a risibí nan promé bakuna i na Merka 60,5%, esaki na Boneiru ya ta 71,5%. Kaminda ku na Chile i Merka respektivamente 50.6% i 48,8% a risibí tur dos bakuna, na Boneiru esaki ta 50,7%.

Frontera ta habri

Poko poko, vários pais a kuminsá kita restrikshon pa hendenan ku ta ful bakuná. Spaña por ehèmpel a eliminá tur barera pa biahero for di Amerika Latina ku ta kompletamente bakuná. Komo eksigensia sinembargo a pone sí ku mester trata di un bakuna mundialmente rekonosí i aprobá, manera Pfizer, Moderna i AstraZeneca.

Hopi paisnan na Amerika Latina ta usando e bakuna rusa Sputnik V, pero esei na hopi pais no ta wòrdu rekonosé ainda komo bakuna ku a pasa tur fase di investigashon sientifiko kaba.