Boneiru ta preukupá ku kaida di gabinete: ‘Nos no por pèrmití posponementu awor aki’

Ki konsekuensia e kaida di e gabinete tin pa e munisipionan Karibense? ‘Masha hopi’, e diputadonan di Boneiru ta di opinion. “Nos ta konfrontando retrasonan grandi aki”, diputado Jolinda Craane ta bisa. “Ora ta trata pobresa nos no por pèrmití posponementu awor aki.”

Pa Caribisch netwerk | Marit Severijnse

Partidonan den gobièrnu VVD, CDA, D66 i ChristenUnie a saka stèker for di gabinete pasobra nan no a yega na un akuerdo ku un maneho di asilo nobo. Riba 22 di novèmber lo tin elekshon nobo i te ku e dia ei lo no tuma desishonnan grandi. E último biaha, na 2021, a dura kasi un aña promé ku tabatin un gabinete nobo.

Retraso mínimo sosial 

Diputado Hennyson Thielman tambe ta ekspresá su preukupashon pa e situashon. “Kaida di e gabinete tin efekto sigur pa Boneiru. E lo pèrkurá pa retraso den e asuntunan ku ta kanando ainda i esei nos ta haña lástima.”

Masoménos kuarenta porshento di poblashon di Boneiru ta biba  den pobresa. Despues di kasi djestres aña no tin ainda un mínimo sosial pa e munisipio spesial, kontrali na Hulanda Europeo. “Na luna di òktober lo a publiká e rapòrt tokante un mínimo sosial, pero sinseramente mi no ta fèrwagt ku despues di esaki un desishon lo kai.”

Ta lástima ku ministernan ta bai

Thielman ta haña lástima tambe ku minister demishonario Carola Schouten di Maneho di Pobresa (ChristenUnie) ta bandoná polítika. “El a dal sierto stap pa Boneiru. E ta un persona ku si tabatin sentimentu pa e islanan i pa traha huntu ku nos.”

Na 2022 Schouten (Maneho di Pobresa) a bisa den Tweede Kamer ku mester regla e mínimo sosial na 2025. Ta un promesa, pero e no ta un fecha límite definitivo, loke ta un frustrashon grandi pa e bònt di konsumidó Unkobon. Mientrastantu el a instituí un komishon independiente ku ta bai saka un rapòrt ku konseho na luna di òktober.