KRALENDIJK - Boneiru, segun por dedusí, a gana un bataya kontra di Hulanda ku tumamentu bèk di resposnabilidat pa suministrá kombustibel na Boneiru. Algun aña atras, despues di problemanan na Oil Trading Bonaire (OTB), hulanda via di Bonaire Bon Transition, a tuma e responsabilidat ofer pa konstruí terminal nobo pa warda kombustibel na Boneiru.
Resientemente Hulanda a ekspresá preokupashon pa motibut di e echo ku lo no tabata posibel mas pa kaba di konstruí e terminal di kombustibel nobo na e lokalidat sùit di aeropuerto promé ku e pèrmit temporal di e terminal di kombustibel eksistente vense.
Loke ku tambe ta hasi falta riba término largu ta e base di sosten pa un almasenamentu di kombustibel na e lokalidat aki. Pa por garantisá almasenamentu di kombustibel seif na Boneiru entrante promé di aprel 2026, lo mester renobá e almasenamentu di kombustibel eksistente pa por kumpli ku e eksigensianan di seguridat original. E partidonan lokal a indiká ku por alkansá esaki promé ku promé di aprel 2026.
Pa suministro di kombustibel riba término largu, Entidat Públiko Boneiru (EPB) ta den kontakto ku un kumpradó potensial pa kuminsá di nobo na e almasenamentu di zeta bankrut parti nort di e isla.
BBT
Pa motibu ku BBT (‘Bonaire Bon Transition’, 100% propiedat di ministerio di KGG) no ta bai konstruí un terminal di kombustibel riba término kòrtiku i largu na Boneiru, lo traha un plan di desmantelashon pa sera e parti di BBT ku a establesé pa esaki.
Ku esei Reino no tin un ròl di maneho mas den suministro di kombustibel i esaki ta bolbe bira un tarea di e isla. Un punto di atenshon aki ta e 5 mion euro ku tin aktualmente den BBT ku e meta pa “almasenamentu di kombustibel” di Boneiru for di e ènvelòp regional.
Ta sondea di ki manera por usa e rekursonan aki pa suministro di kombustibel di Boneiru. Tambe ta investigá di ki manera i kon e parti di BBT ku ta hunga un ròl den sostenibilidat di Boneiru por sigui eksistí.