Notisia

Boneriano di 14 aña na kaminda pa PSV na Hulanda

Zairick i su mama, huntu ku direktor di TCB Miles Mercera (l) i diputado Hennyson Thielman (r)

KRALENDIJK- Na luna di novèmber 2022 Tourism Corporation Bonaire (TCB) i e klup di futbòl PSV a kuminsá ku un akshon di gana úniko pa tantu e poblashon lokal di Boneiru komo fanátikonan di PSV na Hulanda. Esaki ta na interes di e kolaborashon entre PSV i Entidat Públiko Boneiru.

Fanátikonan di PSV tin chèns pa gana un biahe pa dos persona pa Boneiru. Na mes momentu habitantenan di nos isla tin chèns pa gana un baihe pa dos persona pa bishitá Eindhoven i e klup di futbòl PSV.

Dia 9 di yanüari TCB i PSV a aserká e ganadónan. Na Boneiru señora Mariela Keller i su yu hòmber Zairick Merenciana ta e felis ganadónan. Zairick Merenciana tin 14 aña i ku 6 aña el a kuminsá hunga futbòl den ATC i aktualmente e ta hunga den Atlétiko Flamingo. Den luna di mart nan lo biaha pa Hulanda kaminda nan ta hospedá na Eindhoven i bishitá un wega na kas VIP entre PSV i CAMBUUR. Tambe nan lo haña un rekorido den Philips Stadion i nan ta hasi un bishita na e kompleho di entrenamentu ‘De Herdgang’.

Miles Mercera, direktor di TCB i diputado Hennyson Thielman a entregá e premio na señora Mariela Keller i Zairick Merenciana.

Na Hulanda señora Marieke van Dam ta e felis ganadó. Señora van Dam lo biaha huntu ku su kasá pa Boneiru. E pareha ku ta biba na Waalre lo keda na Chogogo Dive & Beach Resort Bonaire.

Hopi partisipante

E akshon di gana a atraé mas ku 5000 partisipante. TCB kordialmente ta felisitá e ganadónan i ta gradisí Chogogo Dive & Beach Resort Bonaire pa nan oferta na e ganadónan.

Deel dit artikel
Rocargo
Rocargo
Rocargo
Rocargo