Kralendijk – E organisashon di hotèl i tursimo na Boneiru, BONHATA ta urgi gobièrno i minister di Salubridat Públiko pa bin ku un maneho kla ora ta trata atmishon di turista ku ya ta bakuná. Esaki BONHATA a skibi den un relato di prensa djasabra.

“E grado di bakunashon na Boneiru ta oumentando kontinuamente i pronto lo yega n’e 75% bakunashon nesesario pa por papia di “imunidat kolektivo”(herd immunity). Asta ta aspirá na un grado di bakunashon di 85%. Tambe den regionnan di kual mayoria di nos turistanan ta prosendente di dje, Nòrt di Merka i Wèst Europa, mas i mas persona ta ser bakuná kontra COVID-19” asina BONHATA ta skibi.

Tambe e organisashon ta mustra ku, despues di mas ku un aña di “lock down” i restrikshon, hopi ta esnan ku ta planeando nan vakashon di “zomer” of nan lo ta spera di por biaha despues di e temporada di “zomer”.

“Boneiru mester responde na e yamada aki i presentá un maneho kla pa loke ta turistanan bakuná, di forma ku no solamente nan, pero tambe nos hendenan i empresarionan aki na Boneiru, sa unda nan ta pará i por kuminsá hasi tramite pa habri nos isla i nos ekonomia”, segun BONHATA.

Kompetensia

E organisashon finalmente ta mustra ku tin diferente otro destinashon, hopi biaha kompetidó di Boneiru ora ta traha e deporte di sambuyamentu, ku sí a duna klaridat kaba. Ta mustra den e kuadro aki riba entre otro Belize i Phuket na Tailandia.

“Pa e motibu aki nos ta urgi gobièrno i ministerio na hulanda pa asigurá ku tin klaridat riba e punto aki, i pa nos no pèrdè oportunidat pa rekuperá nos turismo, i ku esei tambe ekonomia di e isla”, asina BONHATA ta konkluí.