Kralendijk – Bonhata ta mira ku satisfakshon riba e rekuperashon di e sektor turístiko. Ta bisto ku Boneiru ta mas okupá ku binida di estranheronan. Mas okupá ta nifiká alabes ku pa gran mayoria di e sektor turístiko tin mas oportunidat di negoshi, kua anteriormente mester a sufri dor di e inaktividat kompleto despues di e brote di Covid-19 den 2020.

Okupashon pa akomodashonnan den luna di ÿuli a yega alrededor di 70% I ougùstùs alrededor di 75% Kompará esaki ku ÿuli i ougùstùs di 2020, kual tabata 20- 25%, ta un subida signifikante. E subida aki a sòru pa e fenómeno di “Christmas in the Summer” i por a nota subida di okupashon di kambernan di hotel, mas trip di buseo pa diveshop a tuma lugá, restorantnan tambe ta yen, kompanianan di hür outo mester hasi nan sòm pa por sirbi kliente. Hopi ta esnan ku a kuminsa gana nan pan bek den e sektor aki, sea direkto òf indirekto.

Variante Delta ta lur

Ousensia di un maneho klá pa loke ta e pasonan ku mester tuma awor ku e variante “Delta” a hasi su entrada aki na Boneiru, por sòru pa e rekuperashon aki ta keda algu solamente temporal, mientras ku e sektor turístiko ta un di e industrianan kaminda hopi ta gana nan sèn for di dje aki na Boneiru. “Nos a mira kon e variante “Delta” mesora a impaktá partinan di sektor turístiko na nos islanan bisiña i te sierto grado diferente aktividat mester a ser kanselá por kompleto òf adaptá. Rekuperashon di e sektor i apoyo atraves di e NOW/TVL no por kompará ku e eksperensia di e industria turístiko pa e ultimo 15 lunanan. Mester bin un maneho klá pa garantisá kontinuidat den e sektor aki”, asina Bonhata ta skibi den un relato di prensa.

Bonhata ta nota tambe ku turismo for di Merka no a regresá kompletamente, kompará ku e situashon promé ku e Pandemia.