KRALENDIJK- Wes a hala atenshon di Entidat Publiko Boneiru tokante e tarifa eksorbitante di impuesto di awa shushi pa hotèlnan i restorantnan. 

Dia 9 di ougùstùs wes a duna veredikto den un kaso den korte ku Bonaire Hotel and Tourism Association (BONHATA) a entamá na nòmber di i huntu ku su miembronan kontra Entidat Públiko Boneiru. Entidat Públiko Boneiru tabatin intenshon pa entrante 1 di yanüari 2023 kobra e hotèlnan $ 600,– pa aña pa kada kamber i e restorantnan $ 600,– pa kada kushina pa deshasí di awa shushi den e sistema di kloaka. Despues di un kaso sumario a posponé e fecha di drenta na vigor di 1 di yanüari 2023 te 1 di òktober 2023.

Wes a stipulá ku e ordenansa di awa shushi manera ku Konseho Insular a aprobá esaki na luna di desèmber 2022, en todo kaso ta en pugna ku e Lei Finansa Entidatnan Públiko BES (FinBES) i ku e prinsipionan general di bon gobernashon. Pa loke ta trata e parti di impuesto pa hotèlnan i restorantnan, wes a deklará e ordenansa di awa shushi komo no-aplikabel i pa e motibu akí no por apliká esaki for di e momentu di drentamentu na vigor dia 1 di òktober binidero. 

Kriterio

Wes ta haña ku e komposishon i e kantidat di awa ku ta deshasí di dje lo mester ta e kriterio pa determinashon di altura di e impuesto (segun e prinsipio di ‘esun ku shusha ta paga’, manera BONHATA a argumentá). Esaki na lugá di e kriterio ku Entidat Públiko Boneiru ta usa, esta ku prinsipalmente hotèlnan i restorantnan lo mester paga pa purifikashon di awa di kloaka. 

Wes a fiha ku Entidat Públiko Boneiru mester paga BONHATA e gastunan di e kaso. Den e kaso akí BONHATA a haña asistensia di ofisina di abogado VANEPS.