KRALENDIJK – Bonaire Hotel and Tourism Association (BONHATA)Durante e reunion general anual di miembro ku a tuma lugá dia 27 di sèptèmber na Delfins Beach, a tuma despedida di Bas Noij komo presidente. Despues di kuater aña Bas Noij ta stòp ku su funshon i awor ta pasa e batuta ofisialmente over pa Luite Berkenbosch.

Durante su diskurso di despedida Noij a bisa ku e ta haña ku ta un previlegio grandi pa durante nuebe aña e por a forma parti di direktiva: ‘Mi a gosa intensamente di e temporada akí ku boso tur. Durante e último nuebe aña e sektor a pasa den hopi kos i pa mi ta un previlegio grandi pa tabata involukrá ku tantu desaroyo asina. Mi a hasi mi bèst pa guia BONHATA i nos sektor durante un periodo tumultuoso di kambio di personal, kambionan i retonan polítiko i un pandemia ku a asotá henter mundu.’

Durante e reunion general di miembro a skohe tambe e kandidatonan nominá den e direktiva nobo. Awor akí e direktiva ta konsistí di Luite Berkenbosch, presidente (The Bellafonte), Paul Coolen, vise presidente (Buddy Dive), Charles Vos, secretario/tesorero (Grand Windsock), Claire Sealy (Captain Don’s Habitat), Casper Naber (Van der Valk Plaza), Michiel van Heusden (Epic Tours Bonaire), Junny Janga (Budget Rent a Car), Tom Peeters (VanEps) i Celine van de Meer (Divi Flamingo). Den e próksimo dos aña ku hopi ambishon nan ta bai hala e garoshi.

Rekuperá retraso

Berkenbosch a papia tokante e mishon di BONHATA, e vishon pa futuro tokante turismo na Boneiru ku kresemente sostenibel i kon den futuro nos por traha mas mihó huntu komo sektor. Resientemente algun akomodashon grandi a bira miembro (di nobo) di BONHATA i ku esaki e ambishon pa ta uní komo sektor di akomodashon den su totalidat a keda práktikamente realisá. Ku e lema: huntu nos ta fuerte, durante e reunion Berkenbosch a hasi un yamada riba e último akomodashonnan tambe pa riba término kòrtiku afiliá komo miembro.

A wak bèk tambe riba e aña tras di lomba. E rekuperashon di retraso despues di Covid por ehèmpel a kondusí na un punto kulminante den kantidat di bishitante, no opstante e echo ku te ainda un parti di mundu no por biaha sin limitashon. Kompará ku e añanan anterior por konstatá un subida di e Average Daily Rate (ADR) na e akomodashonnan.  

Boneiru Kapital Kulinario

E invitado spesial Erik Wolf (fundadó di World Food Travel Association) a tene un diskurso inspirativo tokante turismo kulinario. El a papia tokante kon destinashonnan kulinario ta desaroyando, kon e konsumidó/biahero a kambia i kon nos por ofresé nan e mihó eksperensia riba tereno di turismo kulinario. CEO Veroesjka de Windt a sera e anochi ku un resúmen di e prestashonnan di e asosiashon durante e aña tras di lomba riba tereno di atendementu di interes, e diferente proyektonan di kolaborashon ku Tourism Corporation Bonaire, Entidat Públiko Boneiru i otro partnernan stratégiko. Tambe el a anunsiá e próksimo eventonan kaminda BONHATA huntu ku TCB ta bai representá e akomodashonnan i e proveedornan di aktividat.