KRALENDIJK- Riba djárason 21 di sèptèmber, den un ambiente ameno, a introdusí Genesis Saragoza, e konsehero di komunikashon/bosero nobo , di Kuerpo Polisial Hulanda Karibense na prensa.

Genesis Saragoza ta prosedente di Boneiru i a biba riba e isla te na momento ku 5 aña pasá el a bai studia Komunikashon Internashonal na Hanze Hogeschool na Groningen, na Hulanda. Despues di su estudio, Genesis a traha pa mas di 2 aña na Fundashon Simavi na Amsterdam, Hulanda den e departamentu di komunikashon.

Genesis ta sigui Miluska Hansen ku a kumpli ku e funshon aki for di promé di ougùstùs 2017, pa mas di 4 aña. A probechá di e oportunidat pa tuma despedida di forma ofisial di Miluska.

Komunikashon

Genesis, huntu ku Caroll-Ann Soliano, ku komo konsehero di komunikashon via SSO-CN ta sostené Genesis, lo sòru pa e komunikashon eksterno i interno di e Kuerpo na tur tres isla. Pronto lo reforsá e tim di komunikashon di KPCN ku un kolaboradó di komunikashon tambe.