Notisia

Brekmentu algu fuerta ta kondusí na flètayer riba avion di EZ Air

EZ Air resientemente a haña un avion adishonal pa fungi komo reserva, ora tin desperfekto téniko na e otro avionnan. Pòtret: EZ Air

KRALENDIJK- Riba djamars atardi buelo 7Z 671 di EZ Air a hañele konfrontá ku un situashon kaminda e pilotonan mester a ehekutá un prosedura pa baha e avion na un manera seif. 

Aunke e pilotonan a apliká e prosedura korekto, esaki  a kondusí na un situashon ku mester a brek mas fuerte ku normal, despues ku e avion a baha riba pista. 

Despues ku e avion a kore yega plataforma, a konstatá ku e tirenan di e tren di aterisahe tabata baha lentamente i finalmente a keda sin airu. Esaki a pone ku e avion no por a sali bèk pa sigui ku buelo pa Aruba i Kòrsou. Direktor di EZ Air, René Winkel ta bisa ku, kontrali loke a sali inisialmente den medionan di prensa, no ta asina ku e tirenan a rementá. “Den kaso ku un òf mas tayer rementá, e avion no por move mas i mester keda para riba e pista. Esaki sinembargo no ta loke a sosodé den e kaso aki. E avionnan Saab aki tin un mekanismo di seguridat, ku ta laga e tirenan baha di forma gradual i kontrolá ora e temperatura di brek ta subi muchu hualtu. Esaki ta un sorti di fyus, ku na Ingles yama un fusible plug. Na momentu ku temperatura ta subi, e fyus ta dirti pa e airu por skapa for di e tire pa asina evitá un situashon potensialmente peligroso”. 

Pasaheronan di e buelonan pa Aruba i Kòrsou mas lat a wòrdu buská pa otro avion di EZ Air, pa hiba nan pa nan destinashon. Departamentu tékniko di EZ Air a yega ku e mesun buelo aki, pa kuminsá remplasá e tirenan ku a baha. Algu promé ku 12 ‘or di anochi, por a sali ku e avion pa hiba esaki e base di mantenshon, pa duna un inspekshon kompleto, promá ku hink’é bèk den operashon. 

Diskulpa

Winkel ta bisa ku e ta lamentá ku pasaheronan di e buelo en kestion por a spanta dor di e maniobra, pero ku e pilotonan a reakshoná di un manera adekuá. “Dor di e manera ku nan a reakshoná a evita un situashon ferfelu ku por a kondusí na daño na e avion òf un situashon peligroso. Lógikamente nos ta pidi nos diskulpa pa kalke inkonvenensia kousá pa nos pasaheronan”, asina Winkel a klousurá. 

Deel dit artikel
Rocargo
Rocargo
Rocargo
Rocargo