KRALENDIJK – Djarason anochi buelo OR703 di TUI a keda pegá na aeropuerto di Boneiru pa motibu di un fayo tékniko. Pa e motibu ei e pasaheronan ku mester a biaha pa Hulanda no por a sigui nan biahe. Ta spera ku awe e buelo lo por sali 19.20 pa Hulanda.

Un piesa di reserva pa e avion, un Boeing 787-8 Dreamliner, ta na kaminda. Esei ta bini ku e buelo regular for di Amsterdam. Seguidamente mester repará e avion. Ta spera ku lo solushoná e problema rápido i ku e avion por sali pa Hulanda awe, ku retraso di un dia.

E buelo ta un asina yamá buelo kombiná ku Punta Cana na Repúblika Dominikano. Esei ta nifiká ku e pasaheronan, ku a subi abordo na Punta Cana i lo mester a bula pa Amsterdam via Boneiru, tambe a keda pegá na Boneiru.

Pa tur pasahero ku no ta biba na Boneiru TUI a pèrkurá pa akomodashon, kuminda i bibida.