Bululú den Partido BIJ1 na Hulanda

Den Haag- Den e partido BIJ1, die lider Sylvana Simons, tin hopi intrankilidat interno, despues ku direktiva di e partido a disidí di ekspulsá Quincy Gario for di e partido.

Segun un investigashon interno, Gario a hasi su mes kulpabel na ‘maskulinidat tóksiko’ i intimidashon di otro hende, espesialmente hende muhé. A enfatisá sí ku e aktitut agresivo no ta di índole seksual.

Hopi simpatisante di Gario, ku ta un luchadó pa e partido di primera ora, ta desapuntá den e forma ku ke kore ku Gairo for di e partido. Gairo a haña hopi konosimentu na Hulanda, ku akshon kontra di e figura di ‘Zwarte Piet’ den selebrashon di e fiesa di San Nikolas.

“Pa ami mi no ta konsiente ku mi a hasi algu malu”, asina Gario a reakshoná. Dor di hopi hende koló skur i di desidensia afro-amerikano/karibense den e partido, BIJ1 a haña relativamente hopi voto na islanan di Karibe Hulandes.

Bos

Hopi hende den partido tin miedu ku dor di e bululú interno, BIJ1 lo spat for di otro, i asina un di e tiki partidonan ku ta sali hopi na defensa di entre otro e islanan CAS i BES lo pèrdè nan bos den Tweede Kamer.

Na Boneiru den elekshon pa parlamentu hulandes, den mart 2021 un total di 79 hende a vota riba BIJ1, ku representá 2,7% di e kantidat di voto total den e elekshon aki na nos isla. Sinembargo na Saba BIJ1 a haña 116 voto, ku a hasiele e di dos partido mas poplar na e isla ei.