WILLEMSTAD – Aruba, Kòrsou, Sint Maarten i Hulanda ta bai krea un bùrs pa engrandesé e interkambio di studiantenan dentro di Reino. A disidí esaki durante e anual Konsulta  di kuater pais riba Enseñansa, Kultura i Siensia, ku ta tumando lugá na e momentunan aki na Kòrsou.

Segun e minister Hulandes Robbert Dijkgraaf ta importante pa personanan hóben di e islanan haña un perspektiva mihó hasiendo uso di forsa di Reino.

Diferente estudio ta mustra ku hopi studiante Karibense ta enkontrá barera èkstra den enseñansa superior na Hulanda.

Un ‘Caribbean academic orientation year’ mester prepará e studiantenan Karibense mihó riba un edukashon na nivel hbo i universidat na Hulanda.

E tres universidatnan den e área di Karibe mester bai ofresé esei komo un programa kompartí, kaminda nan tin e opshon pa traha huntu ku fakultat- i universidatnan hulandes.

Ta e intenshon pa riba término largu e konekshon entre  enseñansa avansá den e área di Karibe ku e enseñansa superior na Hulanda ta bira mihó.