Notisia

Call Center ta risibiendo sinku biaha mas yamada ku normal

Call Center ta risibiendo sinku biaha mas yamada ku normal
Foto OLB

KRALENDIJK- E callcenter pa traha sita pa pasa tèst di COVID-19 den último dianan aki ta risibiendo un avalansha di yamada pa hende ku ta sospechá ku nan a kontagiá ku e virus. 

Normalmente e sentro di yamada ta haña 200 yamada riba un dia i riba dianan mas drùk 400. Durante último dianan e sentro a haña hopi mas yamada: te ku 1030 riba djaluna ku a pasa.

Loke ta hasi e situashon mas kompleho ta e echo ku e sentro di yamada i Salubridat Públiko meskos ku otro dunadó di trabou ta enfrentá e situashon kaminda miembronan di personal ta den isolashon òf den karentena. Un tempu pasá, Salubridat Públiko a hasi un yamada na públiko pa evitá e ora mas okupá mainta i yama mas lat den dia. A amplia tambe e oranan pa entrada liber pa e dos anguanan di corona.  

Kambio

E situashon aktua ta fòrsa e departamento di Salubridat Públiko pa implementá un sistema nobo di traha. Den e aserkamentu nobo, trahadónan no ta yama hendenan den isolashon òf karentena mas pa mira si nan tin keho i si nan por sali for di isolashon òf karentena. Esei e hendenan mes ta disidí. Nan ta haña un meil ku splikashon ki ora nan por sali for di isolashon òf karentena. E informashon akí ta tambe riba https://www.bonairecrisis.com/covid-19-informatie.  

Isolashon

Generalmente isolashon ta dura 7 dia. Hendenan ku tabatin keho, riba e di 7 dia despues di nan promé dia di malesa por sali for di isolashon si nan no tin keho mas. E promé dia ku nan tabatin keho, ta konta komo dia 0.  Esaki sin embargo no ta konta ora hende sigui ku síntoma. Por sali for di isolashon solamente ora no tabata tin keho pa mas ku 24 ora. 

Deel dit artikel