KRALENDIJK- Djasabra a firma un CAO nobo pa trahadónan di e kompaña Cargill, ku diferente kondishon di trabou mehorá. 

“Awe nos ta firma loke tur trahadó a aprobá. Sigur un logro grandi pa trahadónan, loke nan mes a opta pe. Nos huntu ku gerensia di Cargill, a negoshá bon pa e resultado. Negoshashon no tabata fásil, pero a bai den un forma transparente i ku rèspèt pa otro su punto di bista. Un negoshashon ku a kana lihé i a tuma dos luna i mei, a firma e akuerdo di negoshashon dia 31 òktober 2022 i pa awe tardi nos ta firma e CAO”, asina presidente di AFBW, Cherrel Kwidama a bisa na e firmamentu. 

E empleado lo risibí un oumento salarial vários aña tras di otro, mientras ku Cargill a bai di akuerdo tambe pa hisa e kontribushon di parti di e kompania pa e areglo di penshun pa e empleadonan. 

Satisfecho

Brian Donovan, Plant Manager tambe a mustra su mes satisfecho. “Mi ta yama danki e tim di Cargill ku a hasi un bon trabou”.