CAO nobo pa empleadonan di Fundashon Mariadal

KRALENDIJK- Fundashon Mariadal djabièrne mainta a firma un CAO nobo. Esaki a tuma lugá den presensia di algun invitado i miembronan di prensa. 

Na e okashon promé ku a firma, Cherel Kwidami presidente di AFBW, a bisa ku awe ta un dia grandi. “Awe nos ta firma un CAO nobo pa trahadónan di Fundashon Mariadal (FM), esaki ta konta pa 2022. Nos tur sa kiko a pasa e último dos aña, e asuntu di e pandemia.  

Kwidama a nota ku ta basta negoshashon a tuma lugá pa por a yega na e momentu pa firma. Mester sigui prepará pa firma e siguiente CAO pa 2023. “Mi ke pidi tur trahadó; usa e CAO nobo komo nan beibel. Les’e, e ta hopi importante. Kana kuné tur dia manera un beibel. Ya nos tin palabrashon pa sigui den kontakto ku Mariadal i no bira lomba bai for di otro,” Kwidama a bisa.  

Dòkter Giovanni Frans, kende a firma huntu ku Cherel Kwidama tambe a papia na e okashon.  “Ta un trayekto nobo nos a kuminsá. Tempu ta sigui i mester biba ku e situashon aktual di bida” asina Frans a bisa. 

Impakto

Frans a papia tambe di e periodio di Covid-19, ku tabata tin un impakto grandi riba organisashon. “Awor nos a firma un CAO nobo pa 1 aña i awor ta sigui traha pa esun di 2023, unu mas moderno i pa ku un durashon mas largu”, asina Frans a klousurá.