KRALENDIJK- Rijksdienst Caribisch Nederland (RCN) a nombra Caroll-Ann Soliano entrante promé di yüni 2025 komo mènedjer di komunikashon nobo na Shared Service Organisatie (SSO CN).
Soliana a nase i lanta na Boneiru. Na 2002, el a bolbe Boneiru despues di su estudio na Hulanda. For di 2010 e la traha pa RCN. Ei el a okupá diferente funshon den e departamento di komunikashon. Por ehèmpel, el a hasi trabou di funshonario di protokòl, konsehero di komunikashon i tambe konsehero seniòr di komunikashon.
Ku su eksperensia amplio i ret di kontakto grandi, el a bira un kara di RCN ku tur hende konosé. Koleganan ta stim’é pa su dedikashon, su lealtat i su forma di konektá ku hende. E ta un lider ku sa kon saka lo mihó for di tur hende. Caroll-Ann ta konosí komo un ‘working manager’ ku un forma práktiko ‘down-to-earth’ di duna direkshon.
“Mi ta ansioso pa ku mi konosementu profundo di e region i mi ret di kontakto amplio na Hulanda Karibense, duna mi aporte pa yuda nos komuniká kla i habrí. Mi lo duna tur di mi kaluroso kurason pa nos komunidatnan i mi lo usa mi ret di kontakto fuerte dentro di i pafó di Hulanda Karibense pa logra esaki. Huntu nos ta hasi e diferensia”, asina Soliana a bisa.
Orguyoso
Ingrid Sealy, hefe di SSO CN, a agregá: “Mi ta orguyoso di Caroll-Ann. E ta un dama profeshonal orientá riba resultado. Su amplio eksperensia i konosementu ta dun’é tur loke e mester pa e, huntu ku su koleganan, sigui traha pa nos siudadanonan na Hulanda Karibense haña komunikashon di gobièrnu konfiabel i aksesibel.”