CBS: porsentahe di poblashon di Boneiru ku ta bou di e nivel di pobresa nashonal ta birando ménos 

KRALENDIJK – E averahe di e entrada disponibel pa gasta na Boneiru ta subi. E averahe di e entrada disponibel pa gasta ta mas haltu pasobra e entradanan hopi haltu ta subi e averahe. Esei Büro Sentral di Estadístika ta informá.

E porsentahe di e poblashon ku ta biba bou di e nivel di pobresa, tin tendensia di bira ménos na Boneiru. E tendensia di forsa di kompra tambe ta stabil.

Siguiendo e ehèmpel di e nivel ámplio di bida na Hulanda,  Büro Sentral di Estadístika, CBS, ta midi esei awor na Hulanda Karibense tambe. Nivel ámplio di bida ta enserá kalidat di bida i e proporshon ku e ta baiendo a kosto di generashonnan di futuro òf di hendenan na otro partinan di mundu.

Pa Boneiru ta identifiká e nivel ámplio di bida utilisando Sustainable Development Goals, e asina yamá SDG’s.

E SDG’s ta un kòmpas pa e retonan ku ta skondí bou di e nivel ámplio di bida. CBS ta wak pa kada SGD for di e perspektiva di e nivel ámplio di bida di Ulanda Karibense. Un di e SGDnan ta ku no por eksisití pobresa.

Bon salú i bienestar 

Salú ta e di dos SGD. E espektativa di bida di hòmber i muhé na Boneiru tin un tendensia kresiente riba término intermedio. Den 2020 no tin diferensia signifikante mas entre e salú di hòmber i muhé. E indikadónan di estilo di bida pa loke ta trata huma, sobrepeso i konsumo di alkohòl no ta mustra ni un tendensia kresiente ni dekresiente.

Igualdat di género

Igualdat di género ta e di tres SGD. Na Boneiru e kantidat di hende muhé den gerensia ta 2.5 porshento. E tendensia ta stabil. E kantidat di hende muhe ku un bon edukashon ta keda konstante. E kantidat aki ta mas haltu serka hende hòmber. No tin retraso di hende muhé riba e punto aki.

Den 2020 e partisipashon na trabou di hende muhé na Boneiru ta 65.7 porshento i pa hòmber 73.6 porshento. Aki e hende muhé tin un retraso kompará ku hende hòmber. E relashon entre e partisipashon na trabou di hende hòmber i hende muhé ta konstante.

Trabou digno  i kresementu ekonómiko 

 Trabou digno  i kresementu ekonómikota e di kuater Sustainable Development Goal ku CBS ta wak. E balor mediano di e entrada disponel ta mustra un tendensia kresiente na Boneiru.

Desempleo na Boneiru na 2020 ta 4.6 porshento i pa komparashon na Hulanda e desempleo di e forsa laboral tabata 4.8 porshento na 2020.

Redusí desigualdat

Redusí desigualdat ta e di sinku Sustainable Development Goal. Na 2020 e total di tur entrada den e grupo mas ariba di binti porshento pa Boneiru tabata 9.3 biaha mas haltu ku e total di e grupo mas abou di binti porshento di e entradanan.

Pas, hustisia i servisionan públiko fuerte 

E último SDG no ta mustra ni desaroyo positivo ni negativo pa tur kuater indikadó pa tendensianan a medio largo plaso. Ta trata di e indikadónan: asistensia na elekshonnan di parlamento, ámtenarnan polisial, víktimanan di krímen i no sintibo seif den bario.