WILLEMSTAD – Coral Estate Luxury Resort en Karakter a kuminsá ku resiklahe di bòter di plèstik i bleki di aluminium.

Mientras tantu a pone 10 módulo di resiklahe na Coral Estate Luxury Resort. “Nos ke hasi nos wéspetnan lokal i internashonal konsiente ku resiklahe ta posibel na Kòrsou tambe”, segun doño Jorrit Heekelaar. “E ta pas perfektamente den nos strategia pa ofresé un produkto mas duradero posibel.”

Meskos ku Emerald Apartments, Bohemi Resort i diferente proyekto dentro di Blue Bay, e parke di fakansi luhoso aki tambe a kuminsá awor ku rekolekshoná bòternan di plèstik i blekinan di aluminium pa sigui prosesá i eksportá pa resiklahe.

Green Force ta e kompania ku ta enkargá ku e resiklahe. E ta hasi un yamada na e asosashon di doñonan di tantu Blue Bay, Coral Estate i tambe Jan Sofat pa krea proyektonan similar pa e habitantenan di e barionan aki.