Deporte

Crossfitternan di Boneiru ta finalisá e Máratòn di 24 ora ku éksito 

KRALENDIJK – E wikènt tras di lomba a tuma lugá un akshon spesial  kaminda crossfitternan tababa hasi deporte huntu ku un máratòn di 24 ora largu. Nan meta, rekoudá sèn pa banko di kuminda. Jorieke Haarhuis, un di e organisadónan i alabes partisipante, ta konta entusiasmá di e dia eksitoso. “Nos a kuminsá djasabra 7’or i ta sigui te djadumingu 7’or,” Haarhuis ta bisa. “E ta un esfuerso intensivo, pero e espiritu di tim a hasi tur kos bale la pena.” Na tur a kolektá un 3000 dòler kaba pa e banko di kuminda di Boneiru.

Un grupu grandi di crossfitter tabata den akshon ainda djasabra atardi. Nan tabata rema entre otro riba un baiskel fiho i tabata hasi ehersisio. Na e momento ei ya nan tabata hasiendo deporte sin interupshon pa djes ora kaba, komo parti di un máratòn di 24 ora. Kada ora nan mester a alkansá un kantidat stipulá di punto. Si no a logra esei, esaki lo a nifiká final di e kompetensia. Un dia intensivo i desafiante. E deportistanan, hende hòmber i hende muhé, a partisipá na e kompetensia ku tabata hiba e nòmber 24AMRAP 2024 winter edition.

Banda di e esfuerso físiko por papia tambe di un kompetensia sano. “E no ta trata di un kompetensia kontra otro, pero nos tur ke hasi nos máksimo esfuerso si,” segun Haarhuis. “Tin partisipante di diferente pais, entre nan Hulanda, Alemania i Merka. Ta fantástiko pa mira kon tur hende ta hasi nan esfuerso.”

Crossfit ta biba riba e isla

Por sinti e  entusiasmo di e partisipantenan. “Nos a pidi amigunan pa pasa i enkurashá nos. Esei ta yuda di bèrdat pa pasa dor di e momentonan pisá,” Haarhuis ta bisa.  Apesar di e kalor i falta di soño e ambiente ta keda bon. “Nos ta pèrkurá pa nos kome bon, dal un baño ratu ratu i i debesenkuando por drumi tambe djis un ratu, esei ta importante.” 

E amantenan di deporte no ta partisipá solamente pa finalisá e 24AMRAP 2024. Nan ta rekoudá tambe sèn pa e bon kousa. Aña pasá a rekoudá un montante grandi i a entregu’é na e banko di kuminda. Ku e sumanan rekoudá di e akshon e aña aki e partisipantenan ta spera di duna e banko di kuminda un sosten fuerte. “Kada kontribushon ta konta,” Haarhuis ta bisa. “Nos ta orguyoso di tur loke nos a logra i ta spera di hasi esaki otro aña atrobe.”

Na tur 29 tim a partisipá na e kompetensia. E timnan di Boneiru a finalisá finalmente na di djesun i di bintiun lugá. E tim di mas fuerte tabata un tim di Merka. Djaluna mainta a anunsiá ku e crossfittersnan ya a rekoudá 3000 dòler pa banko di kuminda. E montante aki lo por subi ainda e dianan benidero.

Deel dit artikel