Rincon tin su mes Cruyff Court awor. Un Cruyff Court ta un pida tereno di bala ku por topa den diferente bario. Ku e aserkamentu di Cruyff Court nos ta duna e hóben oportunidat pa hasi deporte den un ambiente seif i sigur.

Diferente partner a traha huntu e aña tras di lomba pa realisá e proyekto di Cruyff Court Boy Frans na Rincon.  Entidat Públiko Boneiru den kolaborashon ku Cruyff Foundation, Ministerio di Salubridat Públiko, Bienestar i Deporte, UEFA Foundation for Children i tambe Nationale Postcode Loterij ta orguyoso pa presentá e proyekto Cruyff Court Boy Frans.
Johan Cruyff Foundation ta sostené  i desaroyá aktividat deportivo pa mucha na diferente parti di mundu. E meta  prinsipal di Johan Cruyff Foundation ta dirigí riba mucha i hóben vulnerabel. Pa medio di proyektonan di deporte pa mucha ku òf sin limitashon, e Cruyff Court i plenchinan di skol ta duna e muchanan aki un espasio. Un espasio kaminda nan por desaroyá nan mes, sera amistat i tambe kuida i mehorá nan salú físiko i mental. E espasio aki ta ofresé oportunidat pa  saka lo mihó for di nan.

Durante e apertura ofisial  tur e partidonan envolví den e proyekto a firma un asina yamá “konbenio sosial Cruyff Court”.  Sra. Susila Cruijff yu di Johan Cruijff a hiba palabra:  “Mi tata tabata deseá pa hóbennan ta den moveshon, pasó deporte por trese asina hopi kuné!” 

Tambe Leo Frans ruman di Boy Frans, na kende a dediká e Cruyff Court, a hiba palabra durante e apertura ofisial, mustrando gratitut pa nombrá  e vèlt na nòmber di Boy Frans.

Diputado Kroon por último a klousurá e parti ofisial : “E meta no ta únikamente pa hasi deporte so, sino tambe pa tene kuenta ku responsabilidat sosial, integrashon, sa di hunga ku otro i tambe pa tene kuenta ku norma i balor durante wega”.  Diputado Kroon a finalisá bisando pa tur hende kuida i protehá e vèlt.

Despues di a desvelá e bòrchi a sigi un tremendo partido di futbòl entre hóbennan di Rincon riba e Cruyff Court nobo.