Daisy Coffie (M21) ke wòrdu aktualisá tokante situashon na Bonlab

KRALENDIJK – Miembro di Konseho Insular pa Frakshon di M21, Daisy Coffie, ke haña un aktualisashon di parti di Konseho Ehekutivo tokante e situashon na laboratorio Bonlab. 

“Nos ta yegando yüni 2023, kual ta e luna krusial ku ministerio a duna komo palabrashon di kumpramentu di servisio di ZJCN serka BONLAB bou di e kondishon ku un komishon lo entregá un konseho pa un manera nobo di atendé ku kuido di laboratorio na Boneiru”, asina Coffie ta skibi den un karta pa Kolegio Ehekutivo. 

Segun Coffie ta bon kla e posishon ku tantu Kolegio Ehekutivo i Konseho Insular a tuma den esaki i esei ta ku Boneiru lo mester tin dos laboratorio i e motivashonnan i argumentonan pa esaki ta bon konosí i dokumentá. 

“Mirando ku nos ta yegando 1 di yüni 2023 i ku nos di Konseho Insular en todo kaso no ta risibiendo ningun informashon ofisial, ami ke hasi uso di artíkulo 45 di reglamentu di órden pa hasi  preguntanan na Kolegio Ehekutivo ku e petishon pa reakshon verbal den e próksimo reunion públiko di Konseho Insular”, asina karta di Coffie ta bisa. 

Pregunta

Coffie ke sa, entre otro, si a kaba di instalá un komishon ku lo bin ku un konseho tokante e maneho nobo di kuido di laboratorio na Boneiru. Si ta asina Coffie ke sa ken ta e miembronan di e komishon aki, kiko nan enkargo ta, na ken na lo raportá i si tin un akuerdo entre EPB i ministerio pa loke ta traha trabou di e komishon aki. 

Tambe Coffie ke sa si a kaba di instalá un hunta di komisario, manera e statutonan di Bonlab ta preskribí, kiko presis ta bai sosodé entrante promé di yüli benidero, si tin un plan sosial kla den kaso ku Bonlab lo no sigui i si Kolehio Ehekutivo a reservá e fondonan nesesario pa paga pa esaki.