KRALENDIJK- Segun Daisy Coffie, lider di frakshon di M21 den Konseho Insular, den último simannan por a skucha  hopi sonido negativo rondó di desaroyonan den Konseho Insular i tambe e grifir interino Arjen de Wolff, pero realidat ta ku e organisashon di Konseho Insular awor aki a kuminsá fungi riba un nivel kompletamente diferente. 

Esaki Coffie a trese dilanti den entrevista ku Bubui Cecilia den programa na radio emisora BON FM. “Dia ku e grifir anterior a retirá basta repetinamente, mester a nombra un grifir interino, entre otro pa regla i organisá kosnan ku nunka anteriormente no a wòrdu reglá na drechi”, asina Coffie a bisa. 

Coffie a bisa ku e grifir interino a atendé no mes ku 6 diferente areglo ku ta importante pa funshonamentu di Konseho Insular i e kondishonnan bou di kua esaki por sosodé. “Awor aki ta purba pone hopi kos den lus negativo, pero lagando na banda e echo ku tur nuebe miembro di Konseho tabata involví den esaki. No ta solamente un biaha a papia tokante tur esakinan, pero ta simannan largu a deliberá ku otro riba e kambionan proponé”, asina e lider di M21 a trese dilanti. 

Aprobashon

Coffie a mustra tambe riba e echo ku tur areglo ku mester a haña di Rijksvertegenwoordiger Jan Helmond a haña esaki tambe. 

Coffie den e programa, ku a toka vários tema, a trese dilanti tambe ku e no por a kita e impreshon ku tin sierto forsanan ku intenshonalmente ke pone tur kos den un lus negativo, pero ku en realidat tin hopi trabou positivo ku a wòrdu hasí i den un tempu relativamente kòrtiku a organisá i mehorá hopi kos.