Notisia

Deadline pa hasi petishon pa finansiamentu di estudio serka gobiernu di Aruba ta 17 di yüli 2022

ORANJESTAD – Esun ku ke bai studia i ke bini na remarke  pa un fiansa di estudio di gobiernu di Aruba mester regla esei promé ku 17 di yüli 2022. Despues di e deadline aki e aplikantenan por bini na remarke pa e fiansa di estudio pa yanüari 2023.

Por upload e dokumentunan rekerí na portal di fiansa di Aruba. (https://www.ea.aw/pages/studia/arubalening-portal/).

Eseinan ta entre otro un kopia sertifiká di e diploma. Servisio di Inspekshon di Enseñansa, DIO, ta e instansia ku ta sertifiká diploma.

Tambe mester mustra un prueba ofisial di atmishon pa e skol/institushon di enseñansa. Esaki ta e karta di atmishon ofisial òf meil ku e studiante a risibí di e institushon di enseñansa ku ta bisa ku e studiante mester ta presente 1 di sèptèmber 2022. Den e karta òf meil mester ta pará ku e studiante su atmishon ta aprobá.

Mester tin un prueba di seguro. Pa studiantenan ku ta bai studia na Aruba un skrinshòt di e AZV-app òf un pòtrèt di e karchi di AZV bálido ta sufisiente. Studiantenan ku ta bai studia otro kaminda ku no ta Hulanda, mester upload e pólisa di seguro di e pais kaminda nan ta sigurá.

Informashon di kontakto di mayornan

E informashonnan di kontakto di mayornan tambe mester upload riba e Aruba Student Loan-portal. Si e studiante no tin kontakto ku su mayornan, mester menshoná esaki na e rúbrika “reacties”. Si ambos mayor a fayesé, e studiante mester pone informashon di kontakto di un otro miembro di famia, inkluso su relashon ku nan, por ehèmpel tanta, omo, primu, prima.

Ora a kaba di pasa tur e stapnan i a aprobá esakinan, e studiante ta risibí un Deklarashon di atribushon den su Aruba Studielening-portal. E studiante mester entregá dos Deklarashon di atribushon original huntu ku dos kombenio di finansiamentu di estudio promé ku 18 di yüli 2022.

Ta dura masoménos dos pa tres siman promé ku e studiante risibí e pago riba su kuenta di banko lokal. Ta depositá e sèn riba kuenta di e studiantenan ku ta bai Hulanda promé ku 31 di yüli 2022. 

Deel dit artikel
Rocargo
Rocargo
Rocargo
Rocargo