Kralendijk- Miembro di Konseho Insular pa MPB, Edwin (Din) Domacassé a hasi pregunta por eskrito na Diputado Hennyson Thielman, tokante tardamentu den pago di parti di gobièrnu na entre otro kontratista riba nos isla.

“Komo representante di e digno pueblo di Boneiru, a yega na mi atenshon diferente keho i remarke pa loke ta trata pago hopi lat na kontratistanan i instansianan ku a ehersé un trabou pa gobièrnu. Mi mes komo persona por èhèmpel a bai atendé un asuntu hopi simpel pa loke ta trata e ‘slipway’ i mi a keda mandá di kashi pa muraya:, asina Domacassé ta skibi.

Segun Domacassé, informashon ta drenta ku hopi hende ta hasi trabou pa gobièrnu pero nan no ta haña nan sèn na tempu. Personanan ku a kumpli kabalmente ku gobièrnu desde novèmber di aña pasá, ainda no por disponé di e pago korespondiente.

Desanimá

Domacassé a sigui splika ku esaki ta buta ku nan ta wòrdu desanimá pa sigui traha pa gobièrnu i esaki tin komo konsekuensia ku otronan pafó di Boneiru ta bin tuma e trabou pasobra nan ta mas fuerte na saku. “Ora ku bai averiguá unda e asuntu ta pegá, na tur momento ta mustra ku e kos ta pegá na e departamentu di finansa. Pero no ta e departamentu al lo largo ta keda huzgá, pero e gobièrnu di Boneiru den su totalidat”, asina Domacassé ta skibi den su karta pa Thielman.

Segun Domacassé, bou di portofolio di kolega diputadonan e mesún fenómeno ta tuma lugá. Aunke e ta bisa di por komprondé ku e isla ta den tempu di korona i situashon di krisis, pero ku ta nèt den e tempu di krisis pagonan mester kana pa aliviá hopi doló den nos komunidat.

---