Delegashon a bai Miami pa papia di Boneiru komo destinashon krusero

Kralendijk – E ròl di Boneiru i e deseonan ku tin komo destinashon krusero ta bini dilanti e siman aki durante un konferensia na Miami. Pa esaki un delegashon di Boneiru ku ta konsistí di diputado di desaroyo ekonómiko Hennyson Thielman, kapitan di haf Gunther Flanegin i Tourism Corporation Bonaire (TCB) a biaha pa Miami, Florida.

Durante e kumbre “Return to Sail” di e organisashon Florida-Caribbean Cruise Association (FCCA) diferente kompanianan krusero i destinashon den e sektor krusero ta bini huntu. Nan ta papia tokante desaroyo di e industria i reanudashon di biahenan krusero.

Boneiru ta partisipá na e konferensia akí ku e intenshon pa komuniká e vishon ku nos isla tin pa futuro bishita di barkunan krusero. Awor ku nos ta para na un punto pa kuminsá di nobo, ta un bon oportunidat pa introdusí kambionan. E posibilidatnan ta amplio pa por restrukturá i implementá un maneho mihó balansá. Ku e plan di rekuperashon di turismo, Entidat Públiko Boneiru ya kaba a komuniká e desishon pa aseptá no mas ku un barku krusero pa dia na nos isla i enfoká riba turismo di mas kalidat. Ku un límite di maksimal 1 barku pa dia, e meta ta pa redusí kongestion den sentro di siudat i brinda espasio pa nos atraé turista ku un budget mas grandi ku ta gasta mas na nos isla.

Un otro kambio ku e delegashon kièr kòmbersá di dje ta subida di impuesto di bishitante, ku lo konta tambe pa turistanan krusero yegando Boneiru (remplasando e asina yamá “head tax”). E subida den e impuesto aki lo sòru pa mas sèn den kaha di gobièrnu pa por invertí bèk den fasilidat i infrastruktura pa komunidat i e sektor di turismo.

E delegashon di Boneiru ta bai kòmbersá tokante rekisitonan ku nos komo isla lo rekerí den e añanan benidero di e barku kruseronan. Konsiderando e direkshon ku nos a tuma pa ta un isla “Blue Destination” i e maneho di nos plan di rekuperashon di turismo, lo bai rekerí barkunan pa kumpli ku eksigensianan sostenibel ku ta kuadra den e vishon pa kuida nos medio ambiente.

Un otro tema interesante ta e posibilidat pa liñanan di barku krusero invertí den atrakshon i naturalesa na nos isla. Fasilidatnan ku keda kreá òf mehorá ku e invershonnan akí no ta solamente pa turista pero tambe pa nos hendenan lokal disfrutá di dje. Esaki ta un strategia pa nos kapitalisá i saka mas benefisio for di e barkunan krusero. “E industria krusero ta generá divisa, hopi hende ta dependiente di e industria i e sektor aki ta krea alrededor di 200 kupo di trabou direkto i 600 indirekto. Na mes momentu nos ta kere ku e mester ta mas riba mesun liña ku nos metanan pa ku medio ambiente, mas mihó organisá, mester tin mihó “crowd management” i mihó utilisashon di e merkado pa krusero (“cruise market”). Ku koperashon di TCB nos kièr kordiná e aspektonan aki i hasi algu diferente”, segun Hennyson Thielman, diputado di desaroyo ekonómiko.

E biahe pa topa ku e diferente kompanianan di krusero ta parti di e preparashon pa por risibí barku krusero bèk na nos isla posiblemente den luna di sèptèmber. Lo komuniká klaramente ku e fecha aki ta tentativo i ta dependé di desishonnan den kuadro di maneho di Covid, entre otro kondishonnan pa loke ta trata tèstmentu.

Lesa tambe:

• 
  E tim spesialisá di KPCN ta atendé kriminalidat finansiero ekonómiko ku man duru
• 
  Eksposishon “Hende den Naturalesa” den Parke Nashonal Washington Slagbaai
• 
  Paga tinu riba uso di awa | Aviso
• 
  Ròl prominente pa Boneiru na Konferenia tokante Awa di Nashonnan Uní 
• 
  Prevení Zika, Dengue i Chikungunya |Aviso pagá